ന്യൂഡെല്ഹി: പുതിയ പാര്ലമെന്റ് നിര്മ്മാണ പദ്ധതിക്ക് സുപ്രീം കോടതി അനുമതി. പദ്ധതിക്ക് ലഭിച്ച അനുമതികളിലോ ഭൂമി ഉപയോഗത്തിലോ ഒരു ക്രമക്കേടും കണ്ടെത്തിയിട്ടില്ലെന്ന് നിരീക്ഷിച്ചുകൊണ്ടാണ് കോടതി പദ്ധതി നിര്മ്മാണത്തിന് അനുമതി നല്കിയത്. ജസ്റ്റിസുമാരായ എഎം ഖാന്വില്ക്കര്, ദിനേശ് മഹേശ്വരി, സഞ്ജിവ് ഖന്ന എന്നിവര് ഉള്പ്പെട്ട മൂന്നംഗ ബെഞ്ചാണ് വാദം കേട്ടത്.
പാര്ലമെന്റ് മന്ദിരമടക്കമുള്ള സെന്ട്രല് വിസ്താ പദ്ധതിക്കെതിരെ ഉള്ള ഹരജികളിലാണ് സുപ്രീം കോടതി വാദം കേട്ടത്. പദ്ധതി റദ്ദാക്കണം എന്നാവശ്യപ്പെട്ട് പത്ത് ഹര്ജികളാണ് സുപ്രിം കോടതിക്ക് മുന്നില് എത്തിയത്.
ഡിസംബറില് പദ്ധതിയുടെ നിര്മ്മാണ പ്രവര്ത്തനങ്ങള് കോടതി തടഞ്ഞിരുന്നു. പദ്ധതിയുടെ വിവിധ ഘടകങ്ങളുമായി ബന്ധപ്പെട്ട് നിരവധി ഹരജികള് നിലനില്ക്കുന്ന സാഹചര്യത്തില് അവയില് തീര്പ്പുണ്ടായ ശേഷമേ നിര്മ്മാണ പ്രവര്ത്തനവുമായി മുന്നോട്ടു പോകാവൂ എന്ന് കോടതി കര്ശന നിര്ദേശം നല്കിയിരുന്നു.
പുതുതായി പണിയുന്ന ത്രികോണാകൃതിയിലുള്ള പാര്ലമെന്റും അതിന് സമീപം മൂന്നര കിലോ മീറ്റര് ചുറ്റളവില് പ്രധാനമന്ത്രിയുടെ വസതിയും ഓഫീസും അടങ്ങുന്നതാണ് സെന്ട്രല് വിസ്താ പദ്ധതി. പുതിയ കെട്ടിടം ടാറ്റ പ്രോജെക്റ്റ്സ് ലിമിറ്റഡാണ് നിര്മ്മിക്കുന്നത്. 861.90 കോടി രൂപക്കാണ് കെട്ടിടം നിര്മ്മിക്കാനുള്ള കരാര് ടാറ്റ ഏറ്റെടുത്തത്.
Read also: സെന്ട്രല് വിസ്താ പദ്ധതി; ഹരജികള് സുപ്രീം കോടതി ഇന്ന് പരിഗണിക്കും