തിരുവനന്തപുരം : ഡ്രൈ റണ്ണിന് പിന്നാലെ വാക്‌സിന്‍ വിതരണം ചെയ്യാനാവശ്യമായ സിറിഞ്ചുകള്‍ കേരളത്തിലെത്തിച്ചു. ആദ്യഘട്ടത്തില്‍ 14 ലക്ഷം സിറിഞ്ചുകളാണ് ചെന്നൈയിലെ സര്‍ക്കാര്‍ സ്‌റ്റോറില്‍ നിന്നും തിരുവനന്തപുരം റീജിയണല്‍ സ്‌റ്റോറില്‍ എത്തിച്ചത്. വാക്‌സിന്‍ വിതരണം ആരംഭിക്കുന്നതോടെ സംസ്‌ഥാനത്തെ എല്ലാ ജില്ലാ കേന്ദ്രങ്ങളിലേക്കും സിറിഞ്ചുകള്‍ എത്തിക്കും.
ചെന്നൈയിലെ സര്‍ക്കാര്‍ സ്‌റ്റോറില്‍ നിന്നും രണ്ട് ലോറികളിലായി 334 ബോക്‌സുകളിലാണ് സിറിഞ്ചുകള്‍ കേരളത്തിലെത്തിച്ചത്. ഓരോ ബോക്‌സുകളിലും 4,200 പീസ് സിറിഞ്ചുകളാണ് ഉള്ളത്. സര്‍ക്കാര്‍ നിര്‍ദേശിച്ചിട്ടുള്ള മാനദണ്ഡങ്ങള്‍ പാലിച്ചുകൊണ്ടായിരിക്കും വാക്‌സിന്‍ വിതരണത്തിന് എത്തിച്ചിട്ടുള്ള സാമഗ്രികള്‍ സൂക്ഷിക്കുകയെന്ന് അധികൃതര്‍ വ്യക്‌തമാക്കി.
വാക്‌സിന്‍ വിതരണം ആരംഭിക്കുന്നതോടെ തിരുവനന്തപുരം റീജിയണല്‍ സ്‌റ്റോറില്‍ നിന്നും ആവശ്യത്തിന് അനുസരിച്ച് സാമഗ്രികള്‍ ജില്ലാ കേന്ദ്രങ്ങളില്‍ എത്തിച്ചു നല്‍കും. ഇതിനൊപ്പം തന്നെ സംസ്‌ഥാനത്ത് വിതരണം ചെയ്യാനുള്ള വാക്‌സിന്‍ എത്തുന്ന മുറക്ക് അവ സൂക്ഷിക്കാനുള്ള സംവിധാനവും റീജിയണല്‍ സെന്ററുകളില്‍ ഒരുക്കിയിട്ടുണ്ട്. ഇതിനായി റഫ്രിജറേറ്ററുകള്‍, വാക്ക് ഇന്‍ കൂളര്‍ എന്നിവ റീജിയണല്‍ സെന്ററുകള്‍ എത്തിച്ച് വാക്‌സിന്‍ ശേഖരണത്തിന് വേണ്ട ഒരുക്കങ്ങള്‍ പൂര്‍ത്തിയാക്കി.
Read also : കെഎം ഷാജി എംഎല്‍എക്കെതിരെ വധഭീഷണി; അന്വേഷണ സംഘം മുംബൈയിലേക്ക്
