ആലപ്പുഴ: ആർഎസ്എസിന്റെ നേതൃത്വത്തിൽ നടന്ന അയോധ്യാ ക്ഷേത്ര നിര്മാണ ധനസമാഹരണം ഉൽഘാടനം ചെയ്ത ആലപ്പുഴ ഡിസിസി ഉപാധ്യക്ഷന് രഘുനാഥ പിള്ളയെ ന്യായീകരിച്ച് കോൺഗ്രസ്. ആർഎസ്എസ് ബന്ധം ആരോപിച്ചുള്ള സിപിഎം പ്രചാരണം അടിസ്ഥാന രഹിതമാണെന്ന് കെപിസിസി ജനറൽ സെക്രട്ടറി എഎ ഷുക്കൂർ പറഞ്ഞു.
രഘുനാഥപിള്ള വിശ്വാസി ആയതുകൊണ്ടാണ് പിരിവ് നൽകിയത്. ആർഎസ്എസിനെ എക്കാലത്തും എതിർക്കുന്ന ആളാണ് രഘുനാഥ പിളള. ഇത് രാഷ്ട്രീയമായി കാണേണ്ട വിഷയം അല്ലെന്നും എഎ ഷുക്കൂർ കൂട്ടിച്ചേർത്തു.
ചേര്ത്തലയിലെ പള്ളിപ്പുറത്ത് കഴിഞ്ഞ ഞായറാഴ്ചയാണ് സംഭവം നടന്നത്. പള്ളിപ്പുറം കടവില് മഹാലക്ഷ്മി ക്ഷേത്ര മേല്ശാന്തിക്ക് സംഭാവന കൈമാറിക്കൊണ്ടാണ് അദ്ദേഹം ഉൽഘാടനം ചെയ്തത്. ഈ ക്ഷേത്രത്തിന്റെ പ്രസിഡണ്ട് കൂടിയാണ് രഘുനാഥ പിള്ള.
ചടങ്ങിന്റെ ചിത്രങ്ങള് സമൂഹ മാദ്ധ്യമങ്ങളില് പ്രചരിക്കുന്നുണ്ട്. കോൺഗ്രസ് പ്രവർത്തകർ തന്നെ ഇതിനെതിരെ രൂക്ഷ വിമർശനവുമായി രംഗത്തു വന്നിരുന്നു.
എന്നാൽ, ഉൽഘാടനം നിര്വഹിച്ചത് ശരിയാണെന്നും ക്ഷേത്ര പ്രസിഡണ്ട് എന്ന നിലയിലാണ് താന് അത് ചെയ്തതെന്നും ആണ് രഘുനാഥ പിള്ളയുടെ വിശദീകരണം. ഗ്രൂപ്പ് കളിയുടെ ഭാഗമായാണ് തനിക്കെതിരേ പ്രചാരണം നടത്തുന്നതെന്നും അദ്ദേഹം ആരോപിച്ചു.
Also Read: യുഎപിഎയിൽ വിചാരണ വൈകിയാൽ ജാമ്യം അനുവദിക്കാം; സുപ്രീംകോടതി