തിരുവനന്തപുരം: തുടര്‍ച്ചയായി ഉണ്ടാവുന്ന അപകടങ്ങള്‍ ഇല്ലാതാക്കാന്‍ പുതിയ മാറ്റങ്ങള്‍ക്കൊരുങ്ങി കെഎസ്ആര്‍ടിസി. ഇതിനായി കെഎസ്ആര്‍ടിസി ദീര്‍ഘദൂര സര്‍വീസുകളില്‍ നടപ്പാക്കുന്ന ക്രൂ ചെയ്ഞ്ചിംഗ് സംവിധാനം നാളെ മുതല്‍ പ്രാബല്യത്തില്‍ വരുമെന്ന് ഗതാഗത മന്ത്രി എകെ ശശീന്ദ്രന്‍ അറിയിച്ചു. വൈറ്റില കെഎസ്ആര്‍ടിസി അപകടത്തിന്റെ പശ്‌ചാത്തലത്തിലാണ് തീരുമാനം. കൂടാതെ സര്‍ക്കാര്‍ ധനസഹായം മുഖ്യമന്ത്രിയുമായി ആലോചിച്ച് പ്രഖ്യാപിക്കുമെന്നും മന്ത്രി വ്യക്‌തമാക്കി.
ബെംഗളൂരുവിലേക്കും വടക്കന്‍ കേരളത്തിലേക്കുമുള്ള സര്‍വീസുകളിലാണ് ഇത് നടപ്പാക്കുക. തുടര്‍ച്ചയായി ഉണ്ടാവുന്ന അപകടങ്ങളുടെ പശ്‌ചാത്തലത്തില്‍ ജീവനക്കാരുടെ ജോലിഭാരം കുറക്കുക എന്ന ലക്ഷ്യവുമായാണ് ക്രൂ ചെയ്ഞ്ചിംഗ് സംവിധാനം നടപ്പില്‍ വരുത്താന്‍ കെഎസ്ആര്‍ടിസി തീരുമാനിച്ചത്.
നേരത്തെ ദീര്‍ഘദൂര സര്‍വീസുകളില്‍ കണ്ടക്‌ടര്‍ കം ഡ്രൈവര്‍ സംവിധാനമാണ് ഉണ്ടായിരുന്നതെന്നും അത് പുനഃസ്‌ഥാപിക്കണമെന്നും ജീവനക്കാര്‍ ആവശ്യം ഉന്നയിച്ചിട്ടുണ്ട്.
അതേസമയം, അപകടത്തിന് ഇരയായവര്‍ക്കുള്ള സര്‍ക്കാര്‍ ധനസഹായം മുഖ്യമന്ത്രിയുമായി ആലോചിച്ച് പ്രഖ്യാപിക്കുമെന്ന് മന്ത്രി അറിയിച്ചു. പരുക്കേറ്റവര്‍ക്ക് ചികില്‍സ ഉറപ്പാക്കിയിട്ടുണ്ടെന്നും മരണപ്പെട്ടയാളുടെ കുടുംബത്തിന് ഇന്‍ഷുറന്‍സ് അഡ്വാന്‍സ് നല്‍കാന്‍ ആവശ്യപ്പെടുമെന്നും അദ്ദേഹം അറിയിച്ചു.
Read Also: നിയമസഭാ തിരഞ്ഞെടുപ്പ്; ക്രമസമാധാന ചുമതല ബെഹ്‌റയില്‍ നിന്ന് മാറ്റുന്നകാര്യം ചര്‍ച്ചയാകുന്നു
