മലപ്പുറം: ജില്ലയിലെ എടപ്പാൾ മേഖലയിൽ മോഷണം പതിവാകുന്നു. ഒരു മാസത്തിനിടെ 10ഓളം മോഷണ കേസുകളാണ് ഇവിടെ രജിസ്റ്റർ ചെയ്തത്. പൊന്നാനി പോലീസ് സ്റ്റേഷൻ പരിധിയിലെ പൊൽപ്പാക്കര, പോത്തന്നൂർ, പെരുമ്പറമ്പ്, ചേകനൂർ, മാണൂർ എന്നിവിടങ്ങളിലാണ് മോഷണ കേസുകൾ റിപ്പോർട് ചെയ്യപ്പെട്ടത്.
ഒരാഴ്ച മുൻപ് പെരുമ്പറമ്പ് ക്ഷേത്രത്തിന്റെ ശ്രീകോവിൽ കുത്തിത്തുറന്ന് അഞ്ച് പവൻ മാലയും രണ്ട് ഭണ്ഡാരങ്ങൾ കുത്തിത്തുറന്ന് പണവും മോഷ്ടിച്ചിരുന്നു. രണ്ടാഴ്ച മുൻപാണ് പൊൽപ്പാക്കരയിൽ ക്രിസ്തുമസ് രാത്രി ആളില്ലാത്ത വീട്ടിൽ മോഷണം നടന്നത്. ഇവിടെ നിന്ന് സ്വർണാഭരണങ്ങളും പണവും നഷ്ടമായിരുന്നു. ഈ വീടിന് സപീപത്തെ വീട്ടിലും സമാനമായ രീതിയിൽ മോഷണം നടന്നിരുന്നു.
അതേസമയം, വെള്ളിയാഴ്ച ചേകനൂരിലെ ആളില്ലാത്ത വീട്ടിൽ മോഷണം നടത്തിയത് വാതിൽ തകർക്കാതെ അകത്തു കയറിയാണ്. ഇത് ദുരൂഹത വർധിപ്പിക്കുന്നുണ്ട്. പ്രദേശത്ത് മോഷണം പതിവായതോടെ പോലീസ് അന്വേഷണം ശക്തമാക്കിയിരിക്കുകയാണ്.
Malabar News: 9 വർഷത്തിനിടെ വാളയാറിൽ 42 പോക്സോ കേസുകൾ; ശിക്ഷ നടപ്പാക്കിയത് രണ്ട് കേസുകളിൽ മാത്രം