തൃശൂര്: കോര്പ്പറേഷനില് മേയര് പദവി ആര്ക്കാണെന്ന കാര്യത്തില് തീരുമാനം ഇന്നുണ്ടാവും. സിപിഐഎം ജില്ലാ സെക്രട്ടറിയേറ്റ് ഇന്നലെ വൈകിട്ട് ചേര്ന്ന ചര്ച്ചയിലും അന്തിമ തീരുമാനം ഉണ്ടായില്ല. വിമത കൗണ്സിലര് എംകെ വര്ഗീസ് മുന്നോട്ടുവച്ച ഉപാധികളില് ധാരണയാകാത്തതാണ് അനിശ്ചിതത്വം തുടരാന് കാരണം.
നെട്ടിശേരിയില് നിന്നും ജയിച്ച വിമത കൗണ്സിലറാണ് എം കെ വര്ഗീസ്. ഇദ്ദേഹത്തിന്റെ പിന്തുണയോടെ എല്ഡിഎഫ് കോര്പറേഷന് ഭരിക്കാനാണ് സാധ്യയെങ്കിലും വര്ഗീസ് മുന്നോട്ട് വച്ച ഉപാധികളില് ഇതുവരെയും തീരുമാനമായിട്ടില്ല. തദ്ദേശ സ്ഥാപനങ്ങളില് ഭരണത്തിലേറാന് ഒരു ദിവസം മാത്രം ശേഷിക്കേയാണ് തൃശൂര് കോര്പറേഷനില് മേയര് പദവി അടക്കമുള്ള കാര്യങ്ങളില് അനിശ്ചിതത്വം തുടരുന്നത്.
എല്ഡിഎഫിനൊപ്പം നില്ക്കുമെന്ന് വര്ഗീസ് നേരത്തെ തന്നെ പ്രഖ്യാപിച്ചിരുന്നു. കോണ്ഗ്രസ് വിമതനെ കൂടാതെ എല്ഡിഎഫിന് 24ഉം യുഡിഎഫിന് 23ഉം ബിജെപിക്ക് ആറുമാണ് ഇവിടുത്തെ കക്ഷി നില.
അതേസമയം ആദ്യത്തെ മൂന്ന് വര്ഷം മേയര്പദവി നല്കണമെന്നാണ് വര്ഗീസ് സിപിഐഎം നേതൃത്വത്തെ അറിയിച്ചിട്ടുള്ളത്. എന്നാല് രണ്ടുവര്ഷം മേയര് പദവി നല്കാമെന്നും ഭരണത്തിലേറി ആദ്യ വര്ഷം മേയര് പദവി നല്കാനാകില്ലെന്നും ആയിരുന്നു സിപിഐഎം നേതൃത്വത്തിന്റെ മറുപടി.
കാര്യത്തില് അന്തിമ തീരുമാനം കൈക്കൊള്ളാന് സംസ്ഥാന സെക്രട്ടറിയേറ്റിന് വിട്ടെങ്കിലും ജില്ലാതലത്തില് തീരുമാനമെടുക്കാനാണ് നിര്ദേശം. വര്ഗീസിന് മേയര്സ്ഥാനം നല്കുന്നത് നിയമസഭാ തിരഞ്ഞെടുപ്പില് തിരിച്ചടിയാകുമോ എന്ന ആശങ്ക പാര്ട്ടിക്ക് മുന്നില് നിലനില്ക്കുന്നുണ്ട്. എന്നാല് തുടര്ഭരണം ഉറപ്പിക്കേണ്ട ഉത്തരവാദിത്തം കൂടി മുന് നിര്ത്തിയാകും വിഷയത്തില് അന്തിമ തീരുമാനം ഉണ്ടാവുക.
Malabar News: മുന്നണി വിടുമെന്ന ഭീഷണിയുമായി ജോസഫ് വിഭാഗം; യുഡിഎഫിന് ഭരണം നഷ്ടമായേക്കും