Image Source: FB/KPN | Edited and Designed by Team MN
മലപ്പുറം: ജില്ലയിലെ പൊന്നാനി നിയോജക മണ്ഡലത്തിലെ വെളിയങ്കോട് കഴിഞ്ഞ ദിവസങ്ങളിലുണ്ടായ കടലാക്രമണ നാശനഷ്ടങ്ങളുടെ പുനർനിർമാണത്തിലേക്ക് ആദ്യഘട്ടമായി 54.50 ലക്ഷം ചെലവഴിക്കുന്നതിന് സർക്കാർ വകുപ്പുതല സാമ്പത്തിക ഉത്തരവിറക്കി.
ഗ്രാമപഞ്ചായത്തിന്റെ തെക്കുഭാഗത്ത് 182 മീറ്റർ നീളത്തിൽ അടിയന്തര കടലാക്രമണ പ്രതിരോധ പ്രവൃത്തി നടത്തുന്നതിനായാണ് കേരള ജലസേചന വകുപ്പിലൂടെ അടിയന്തിര സാമ്പത്തിക അനുമതി ലഭ്യമായത്. സാങ്കേതിക പരിശോധന, സാങ്കേതിക അനുമതി, ബാധകമായ കരാർ നടപടികൾ എന്നിവ പൂർത്തീകരിച്ച് വേഗത്തിൽ പുനർനിർമാണം ആരംഭിക്കും.
പരിസരത്തെ ഹാച്ചറി കെട്ടിടങ്ങളടക്കം കടലാക്രമണ ഭീഷണിയിൽ ഏതു സമയവും നിലം പതിക്കാവുന്ന നിലയിലാണ്. സ്ഥലം സന്ദർശിച്ച് അടിയന്തിര പരിഹാര നടപടി സ്വീകരിക്കുമെന്ന് കെപി നൗഷാദ് അലി പരിസരവാസികൾക്ക് ഉറപ്പ് നൽകിയിരുന്നു. തുടർന്ന് തിരുവനന്തപുരത്തേക്ക് യാത്രതിരിച്ച എംഎൽഎ ഉത്തരവുമായി തിരിച്ചെത്തിയത് തീരദേശവാസികൾക്ക് വലിയ ആശ്വാസമാണ്.
തീരദേശത്തെയും പരിസരങ്ങളിലെയും ബുദ്ധിമുട്ട് സർക്കാരിനെ ബോധ്യപ്പെടുത്താൻ സാധിക്കുകയും അത്യാവശ്യഘട്ടത്തിലേക്ക് അടിയന്തിര നടപടികളുടെ ഭാഗമായി സർക്കാർ ഫണ്ട് അനുവദിക്കുകയും ചെയ്തത് വലിയ ആശ്വാസമാണ്. മഴക്ക് ശേഷം, നടപടിക്രമങ്ങൾ പൂർത്തീകരിച്ച് പുനർനിർമാണ പ്രവർത്തികൾ ആരംഭിക്കും –എംഎൽഎ നൗഷാദലിപറഞ്ഞു.
തീരദേശത്ത് പ്രദേശവാസികളെ കേൾക്കുന്ന എംഎൽഎ നൗഷാദലി (Image source: K. P. Noushad Ali | Cropped by Team MN)
കടൽക്ഷോഭത്തിൽ നിന്നുള്ള തീരസംരക്ഷണം എന്ന വകുപ്പിൽ ഉൾപ്പെടുത്തിയാണ് ഔദ്യോഗിക സാമ്പത്തിക അനുമതി ലഭിച്ചിരിക്കുന്നത്. കൂടുതൽ വിശദാംശങ്ങൾ എസ്റ്റിമേറ്റിലും സാങ്കേതിക അനുമതിയിലുമാണ് ഉണ്ടാകുക.
അടുത്തദിവസം തന്നെ എസ്റ്റിമേറ്റ് പൂർത്തിയാക്കി മേജർ ഇറിഗേഷൻ ചീഫ് എഞ്ചിനീയർക്ക് സമർപ്പിക്കുമെന്ന് ഇറിഗേഷൻ എക്സിക്യൂട്ടീവ് എഞ്ചിനീയർ അറിയിച്ചു.
അഭിപ്രായങ്ങളുടെ ആധികാരികത ഉറപ്പിക്കുന്നതിന് വേണ്ടി കൃത്യമായ ഇ-മെയിൽ വിലാസവും ഫോട്ടോയും ഉൾപ്പെടുത്താൻ ശ്രമിക്കുക. രേഖപ്പെടുത്തപ്പെടുന്ന അഭിപ്രായങ്ങളിൽ 'ഏറ്റവും മികച്ചതെന്ന് ഞങ്ങളുടെ എഡിറ്റോറിയൽ ബോർഡിന്' തോന്നുന്നത് പൊതു ശബ്ദം എന്ന കോളത്തിലും സാമൂഹിക മാദ്ധ്യമങ്ങളിലും ഉൾപ്പെടുത്തും. ആവശ്യമെങ്കിൽ എഡിറ്റ് ചെയ്യും. ശ്രദ്ധിക്കുക; മലബാർ ന്യൂസ് നടത്തുന്ന അഭിപ്രായ പ്രകടനങ്ങളല്ല ഇവിടെ പോസ്റ്റ് ചെയ്യുന്നത്. ഇവയുടെ പൂർണ ഉത്തരവാദിത്തം രചയിതാവിനായിരിക്കും. അധിക്ഷേപങ്ങളും അശ്ളീല പദപ്രയോഗങ്ങളും നടത്തുന്നത് ശിക്ഷാർഹമായ കുറ്റമാണ്.
