തളിപ്പറമ്പ്: തോക്കും തിരകളുമായി ചവനപ്പുഴ സ്വദേശികളായ രണ്ടുപേരെ പോലീസ് അറസ്റ്റ് ചെയ്തു. ഇരിങ്ങൽ ഹൗസിൽ അനീഷ് (39), എസ്വിപി നിവാസിൽ എം വിജയൻ (44) എന്നിവരെയാണ് കഴിഞ്ഞ ദിവസം നടത്തിയ പരിശോധനയിൽ പിടികൂടിയത്.
സംശയാസ്പദമായ രീതിയിൽ ബൈക്കിൽ യാത്ര ചെയ്യുകയായിരുന്ന ഇവരെ ചാണ്ടിക്കരിയിൽ തടഞ്ഞു നിർത്തിയാണ് പോലീസ് പിടികൂടിയത്. പരിശോധനയിൽ നാടൻ തോക്കുകളും നാല് തിരകളും ചാക്കും കെട്ടാൻ ഉപയോഗിക്കുന്ന കയറുകളും ടോർച്ചും കണ്ടെടുത്തു. ചോദ്യം ചെയ്യലിൽ കാട്ടുപന്നിയെ വേട്ടയാടാൻ പോയതാണെന്ന് ഇവർ പോലീസിനോട് സമ്മതിച്ചിട്ടുണ്ട്.
കുറുമാത്തൂർ പഞ്ചായത്തിന്റെ വിവിധ പ്രദേശങ്ങളിൽ കാട്ടുപന്നി, മുള്ളൻപന്നി തുടങ്ങിയ മൃഗങ്ങളെ വ്യാപകമായി വേട്ടയാടുന്നതായി പോലീസിന് വിവരം ലഭിച്ചിട്ടുണ്ട്. പ്രദേശത്ത് നാടൻ തോക്കുകൾ യദേഷ്ടം ഉപയോഗിക്കപ്പെടുന്നതായും അന്വേഷണത്തിൽ വ്യക്തമായതായി പോലീസ് അറിയിച്ചു. തളിപ്പറമ്പ് മജിസ്ട്രേറ്റ് കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.
Read also: ചൂട് വീണ്ടും കൂടിയേക്കും; മൂന്ന് ജില്ലകൾക്ക് മുന്നറിയിപ്പ്