ദുബായ്: യുഎഇയിലെ കോവിഡ് പ്രതിരോധ പ്രവര്ത്തനങ്ങളില് ഏര്പ്പെട്ട മുന്നിര ആരോഗ്യ പ്രവര്ത്തകരുടെ മക്കള്ക്ക് മുഴുവന് സ്കോളര്ഷിപ്പ് നല്കുന്നു. പൊതുവിദ്യാലയങ്ങളില് പഠിക്കുന്ന ആരോഗ്യപ്രവര്ത്തകരുടെ മക്കള്ക്ക് വേണ്ടിയാണ് പുതിയ പദ്ധതി നടപ്പിലാക്കുന്നത്.
ഗുണ നിലവാരമുള്ള വിദ്യാഭ്യാസം ലഭ്യമാക്കുക, സാമ്പത്തിക ബാധ്യത ലഘൂകരിക്കുക എന്നിവയാണ് പദ്ധതിയിലൂടെ ലക്ഷ്യമാക്കുന്നത്. കോവിഡ് പ്രതിരോധ പ്രവര്ത്തനങ്ങളില് സജീവമായ, ആരോഗ്യ മേഖലയിലെ ജീവനക്കാരെ പിന്തുണക്കുന്നതിന്റെ ഭാഗമായി രാജ്യത്തെ വിദ്യാഭ്യാസ മന്ത്രാലയവും ഫ്രണ്ട്ലൈന് ഹീറോസ് ഓഫീസും ചേര്ന്നാണ് ഇത്തരമൊരു സ്കോളര്ഷിപ്പ് പദ്ധതിക്ക് രൂപം നല്കിയത്. ബിരുദം നേടുന്നതു വരെയുള്ള ട്യൂഷന്, ലാപ് ടോപ്, ഗതാഗതം തുടങ്ങിയ പഠന സംവിധാനങ്ങള്ക്കുള്ള ചിലവും പദ്ധതിയില് ഉള്പ്പെടുത്തും. സ്വദേശികള്ക്കും വിദേശികള്ക്കും ഒരുപോലെ ഗുണം ചെയ്യുന്ന വിധത്തിലാണ് പദ്ധതി തയാറാക്കുന്നത്. ഡോക്റ്റര്മാര്, നഴ്സുമാര് തുടങ്ങി ആശുപത്രികളിലെ ക്ലീനര്മാരുടെ മക്കള്ക്ക് വരെ പദ്ധതിയുടെ ഭാഗമാകാം. താല്പര്യമുള്ളവര് സെപ്റ്റംബര് 30 ന് മുന്പായി വിശദാശംങ്ങള് സമര്പ്പിക്കേണ്ടതാണ്.
Read more: മെഡിക്കല് ടൂറിസത്തില് ജി.സി.സി രാജ്യങ്ങളില് ഒന്നാം സ്ഥാനത്ത് യു.എ.ഇ.
കോവിഡ് മഹാമാരിയുടെ കാലത്ത്, പ്രതിരോധ പ്രവര്ത്തനങ്ങളില് സജീവമായി ഏര്പ്പെടുന്ന ആരോഗ്യ പ്രവര്ത്തകരുടെ വിവരങ്ങള് നേരത്തെ തന്നെ ഫ്രണ്ട്ലൈന് ഹീറോസ് ഓഫീസ് ശേഖരിച്ചിരുന്നു. ഇത്തരം ജീവനക്കാരെ തിരിച്ചറിയുന്നതിനും അവരുടെ പ്രവര്ത്തനങ്ങളെ പിന്തുണക്കുന്നതിനും ഈ വിവരങ്ങള് സഹായിച്ചിട്ടുണ്ട്.