കോഴിക്കോട്: ബാലുശേരി കരുമലയിൽ ഇന്നലെ യുഡിഎഫ്-എല്‍ഡിഎഫ് പ്രവർത്തകർ തമ്മിലുണ്ടായ സംഘര്‍ഷത്തിൽ മൂന്ന് പേർ അറസ്‌റ്റിൽ. സിപിഎം പ്രവര്‍ത്തകരായ മൂന്ന് പേരാണ് അറസ്‌റ്റിൽ ആയത്. കരുമല സ്വദേശികളായ വിപിന്‍, മനോജ്, നസീര്‍ എന്നിവരാണ് അറസ്‌റ്റിലായത്.
ഇന്നലെ യുഡിഎഫ് പ്രകടനം നടക്കുന്നതിനിടെ എല്‍ഡിഎഫ് തിരഞ്ഞെടുപ്പ് കമ്മറ്റി ഓഫീസിന് നേരെ കല്ലേറുണ്ടായിരുന്നു. തുടർന്ന് സ്‌ഥലത്തുണ്ടായിരുന്ന എൽഡിഫ്, യുഡിഎഫ് പ്രവർത്തകർ ഏറ്റുമുട്ടുകയായിരുന്നു.
സംഘര്‍ഷത്തിന് പിന്നാലെ എകരൂരിലെ കോണ്‍ഗ്രസ് മണ്ഡലം ഓഫീസിന് ഒരു സംഘം തീവെക്കുകയും ചെയ്‌തിരുന്നു. പുലര്‍ച്ചെ രണ്ടരയോടെ ആയിരുന്നു സംഭവം. ഫര്‍ണീച്ചറുകളും തിരഞ്ഞെടുപ്പ് പ്രചാരണ സാമഗ്രികളും കത്തി നശിച്ചു. മുസ്‌ലിം ലീഗ് പ്രാദേശിക നേതാവിന്റെ വീടിനു നേരെയും ആക്രമണം ഉണ്ടായിരുന്നു.
Also Read: ജാനകിക്കും നവീനുമെതിരായ സൈബര്‍ ആക്രമണം; കൃഷ്‌ണ രാജിനെതിരെ പരാതി
