കൊച്ചി: വാളയാര് പീഡന കേസില് പ്രതികളെ വെറുതെ വിട്ടതിനെതിരെ സര്ക്കാരും, കുട്ടികളുടെ രക്ഷിതാക്കളും നല്കിയ അപ്പീലില് ഹൈകോടതി ഇന്ന് വിധിപറയും. കേസിലെ പ്രതികളായ വി മധു, ഷിബു, എം മധു, പ്രദീപ് എന്നിവരെയാണ് പാലക്കാട് പോക്സോ കോടതി വെറുതെ വിട്ടത്. പ്രതികള്ക്കെതിരെ കുറ്റം തെളിയിക്കാന് പ്രോസിക്യൂഷനു കഴിഞ്ഞില്ലെന്ന് കാണിച്ച് സംശയത്തിന്റെ അനുകൂല്യത്തില് ആയിരുന്നു നടപടി.
എന്നാല് അന്വേഷണ സംഘത്തിന്റെയും പ്രോസിക്യൂഷന്റെയും ഭാഗത്തുനിന്നും വീഴ്ചകള് ഉണ്ടായിട്ടുണ്ടെന്നും ശക്തമായ തെളിവുകള് പരിഗണിക്കാതെയാണ് വിധി പുറപ്പെടുവിച്ചിട്ടുള്ളതെന്നും ചൂണ്ടിക്കാട്ടിയാണ് സര്ക്കാര് അപ്പീല് നല്കിയത്. ആവശ്യമെങ്കില് തുടര് അന്വേഷണത്തിനോ പുനര് അന്വേഷണത്തിനോ സര്ക്കാര് ഒരുക്കമാണെന്നും സ്പെഷ്യല് പ്രോസിക്യൂട്ടര് കോടതിയെ അറിയിച്ചിട്ടുണ്ട്. 2019 ഡിസംബറില് ആണ് സര്ക്കാര് അപ്പീല് നല്കിയത്.
മാത്രവുമല്ല തെളിവുകള് പരിശോധിക്കുന്നതില് വിചാരണ കോടതിക്ക് വീഴ്ച സംഭവിച്ചതായും സര്ക്കാര് വാദം ഉന്നയിച്ചു.
അതേസമയം തുടക്കം മുതല് പ്രതികള്ക്ക് അനുകൂലമാക്കി പോലീസ് കേസ് മാറ്റിയെന്നാണ് കുട്ടികളുടെ രക്ഷിതാക്കള് പറയുന്നത്.
വാളയാറില് 13 വയസുകാരിയെ 2017 ജനുവരി 13നും സഹോദരിയായ ഒമ്പതു വയസുകാരിയെ 2017 മാര്ച്ച് നാലിനുമാണ് വീട്ടിനുള്ളില് തൂങ്ങി മരിച്ച നിലയില് കണ്ടെത്തിയത്. പ്രതികളുടെ പീഢനം സഹിക്കാനാവാതെയാണ് പെണ്കുട്ടികള് ആത്മഹത്യ ചെയ്തെന്നാണ് കേസ്.