കൽപ്പറ്റ: നടപ്പാതക്ക് നടുവിലൂടെ കൈവരി സ്‌ഥാപിച്ചതിൽ പ്രതിഷേധം ഉയർന്നതിനു പിന്നാലെ വീതി കൂട്ടൽ നടപടികൾ തുടങ്ങി. കൈവരികൾ അതേ സ്‌ഥാനത്ത് നിർത്തിയും കടകളുടെ മുൻഭാഗം പൊളിച്ചു മാറ്റിയുമാണ് നടപ്പാത വീതി കൂട്ടുന്നത്.
നഗര സൗന്ദര്യ വൽക്കരണത്തിന്റെ ഭാഗമായി കൽപ്പറ്റ മാരിയമ്മൻ ക്ഷേത്രത്തിനു സമീപമാണു നടപ്പാതയുടെ നടുവിലൂടെ കൈവരി നിർമ്മിച്ചത്. ടൗണിലെ ബാക്കിയുള്ള ഭാഗങ്ങളിലെല്ലാം നടപ്പാതക്കായി ഇട്ട സ്‌ലാബിന്റെ അരികിലൂടെ സ്‌ഥാപിച്ച കൈവരി ഇവിടെ എത്തിയപ്പോൾ നടുവിലേക്ക് മാറിയിരിക്കുകയാണ്.
Malabar News: വോട്ടര്‍ പട്ടികയില്‍ വ്യാപക ക്രമക്കേട്; പരാതിയുമായി യുഡിഎഫ്
ഓവുചാൽ നിർമ്മിച്ചതിന് ശേഷം നടത്തിയ സർവേയിൽ കടകളുടെ കൂടുതൽ ഭാഗം പൊളിച്ചുനീക്കാനുണ്ടെന്നും ഇതേത്തുടർന്നാണ് കൈവരി നടപ്പാതയുടെ നടുവിൽ സ്‌ഥാപിച്ചതെന്നും ആയിരുന്നു അധികൃതരുടെ വിശദീകരണം. എന്നാൽ കടകൾ പൊളിക്കും മുമ്പേ കൈവരി സ്‌ഥാപിച്ചതിൽ വ്യാപാരികൾ പ്രതിഷേധവുമായി രംഗത്തെത്തി. ഇതോടെ വ്യാഴാഴ്‌ച പ്രവൃത്തി നിർത്തിവെക്കേണ്ടി വന്നു. പിന്നീട് വ്യാപാരികളുമായി അധികൃതർ ചർച്ച നടത്തുകയും കടകളുടെ മുൻവശം പൊളിച്ചുമാറ്റി നടപ്പാതയുടെ വീതി കൂട്ടാൻ തീരുമാനിക്കുകയും ആയിരുന്നു.
