ന്യൂഡെൽഹി: പ്രധാനമന്ത്രി നരേന്ദ്ര മോദിക്ക് നന്ദി അറിയിച്ച് ലോകാരോഗ്യ സംഘടന മേധാവി ടെഡ്രോസ് അദാനോം ഗെബ്രിയോസസ്. ലോകാരോഗ്യ സംഘടന നേതൃത്വം നൽകുന്ന ആഗോള വാക്‌സിൻ പൂളായ കോവാക്‌സിനോടുള്ള പ്രധാനമന്ത്രിയുടെ പ്രതിജ്‌ഞാബദ്ധതക്കാണ് അദ്ദേഹം നന്ദി അറിയിച്ചിരിക്കുന്നത്.
ആഗോള ആരോഗ്യമേഖലയിലും ആരോഗ്യപരിരക്ഷയിലും ഇന്ത്യ വഹിക്കുന്ന പ്രധാന പങ്കിനെ സ്വാഗതം ചെയ്യുന്നുവെന്നും അദ്ദേഹം പറഞ്ഞു. ഇന്ത്യയുടെ ആയുഷ്‌മാൻ ഭാരത്, ക്ഷയരോഗ നിർമാർജന പദ്ധതികൾ തുടങ്ങിയവയേയും ടെഡ്രോസ് അഭിനന്ദിച്ചു.
“കോവാക്‌സിനുള്ള പ്രധാനമന്ത്രി നരേന്ദ്ര മോദിയുടെ പ്രതിജ്‌ഞാ ബദ്ധതക്ക് ഞാൻ നന്ദി പറഞ്ഞു. ലോകത്തെ സംബന്ധിച്ചിടത്തോളം വളരെ അപ്രതീക്ഷിതമായ വെല്ലുവിളിയാണ് കോവിഡ്. അത് അവസാനിപ്പിക്കാനായി തോളോട് തോൾ ചേർന്ന് പ്രവർത്തിക്കാൻ ഞങ്ങൾ തീരുമാനിച്ചു”, ടെഡ്രോസ് ട്വീറ്റ് ചെയ്‌തു.
ലോകാരോഗ്യ സംഘടനാ മേധാവിയുമായി വളരെ മികച്ച സംഭാഷണമാണ് നടന്നതെന്ന് നരേന്ദ്ര മോദിയും പറഞ്ഞു. “ലോകാരോഗ്യം മെച്ചപ്പെടുത്തുന്നതിനായി പരമ്പരാഗത വൈദ്യശാസ്‌ത്രത്തിന്റെ വിശാലമായ സാധ്യതകളെ കുറിച്ച്‌ ഞങ്ങൾ സംസാരിച്ചു. കോവിഡ് 19ന് എതിരായ പോരാട്ടത്തിൽ രാജ്യത്തിന്റെ പിന്തുണ ഞാൻ അദ്ദേഹത്തിന് ഉറപ്പുനൽകിയിട്ടുണ്ട്”, മോദി ട്വീറ്റ് ചെയ്‌തു.
Read also: ബിഹാര്‍; നിതീഷ് കുമാര്‍ തിങ്കളാഴ്‌ച സത്യപ്രതിജ്‌ഞ ചെയ്‌തേക്കും
