മലപ്പുറം : ജില്ലയിലെ സ്‌കൂളുകളിൽ കോവിഡ് വ്യാപനം തുടരുന്നു. മാറഞ്ചേരി ഗവൺമെന്റ് ഹയർസെക്കൻഡറി സ്‌കൂളിലും, വന്നേരി ഹയർസെക്കൻഡറി സ്‌കൂളിലും നടത്തിയ കോവിഡ് രണ്ടാംഘട്ട പരിശോധനയിലാണ് കൂടുതൽ വിദ്യാർഥികളിലും അധ്യാപകരിലും കോവിഡ് സ്‌ഥിരീകരിച്ചത്‌. രണ്ടാംഘട്ട പരിശോധനയിൽ രണ്ട് സ്‌കൂളുകളിലുമായി 180 പേർക്ക് കോവിഡ് സ്‌ഥിരീകരിച്ചു.
മാറഞ്ചേരി സ്‌കൂളിൽ രണ്ടാംഘട്ട പരിശോധനയുടെ ഭാഗമായി 363 പേരിലാണ് കോവിഡ് പരിശോധന നടത്തിയത്. ഇതിൽ 94 വിദ്യാർത്ഥികൾക്കും, 1 അധ്യാപകനും കോവിഡ് സ്‌ഥിരീകരിച്ചു. അതോടൊപ്പം തന്നെ വന്നേരി സ്‌കൂളിൽ 289 പേരിൽ നടത്തിയ കോവിഡ് പരിശോധനയിൽ 82 വിദ്യാർഥികൾക്കും 3 അധ്യാപകർക്കുമാണ് പുതുതായി രോഗബാധ ഉണ്ടായത്.
നിലവിൽ രണ്ട് സ്‌കൂളുകളിലുമായി കോവിഡ് സ്‌ഥിരീകരിച്ച ആകെ ആളുകളുടെ എണ്ണം 422 ആയി ഉയർന്നിട്ടുണ്ട്. കോവിഡ് വ്യാപനത്തിന് ശേഷം സംസ്ഥാനത്ത് 10, പ്ളസ് 2 വിദ്യാർഥികൾക്ക് ക്ളാസ് ആരംഭിച്ചതിന് പിന്നാലെയാണ് മലപ്പുറം ജില്ലയിലെ സ്‌കൂളുകളിൽ വലിയ രീതിയിലുള്ള കോവിഡ് വ്യാപനം കണ്ടെത്തിയത്. ഇതിനെ തുടർന്ന് സ്‌കൂളുകളിൽ കർശന ജാഗ്രത പുറപ്പെടുവിച്ചിരിക്കുകയാണ്. കൂടാതെ ഈ സ്‌കൂളുകളിലും പരിസര പ്രദേശങ്ങളിലും കൂടുതൽ ആളുകളിൽ പരിശോധന നടത്തി രോഗവ്യാപനം കണ്ടെത്താനുള്ള നടപടികളും പുരോഗമിക്കുകയാണ്.
Read also : ഉത്തരാഖണ്ഡ് അപകടം; രക്ഷാപ്രവർത്തനം എട്ടാം ദിവസം, തിരച്ചിൽ തുടരുന്നു
