പാലക്കാട്: പൂളക്കാട് 6 വയസുകാരനെ അമ്മ കഴുത്തറുത്ത് കൊന്നു. ആമിലിനെ അമ്മ ഷാഹിദായാണ് വീട്ടിലെ ശുചിമുറിയിൽ കൊലപ്പെടുത്തിയത്. കൊലപാതകത്തിന്റെ കാരണം വ്യക്‌തമല്ല.
ഭർത്താവിന്റെ മാനസികമായ പ്രശ്‌നങ്ങൾ മൂലമാണ് ഷാഹിദ കുട്ടിയെ കൊലപ്പെടുത്തിയതെന്ന് നാട്ടുകാരിൽ ചിലർ പറയുന്നു. അതേസമയം, മതപരമായ ആഭിചാര പ്രക്രിയയുടെ ഭാഗമായാണ് കൊലപാതകമെന്നും പറയപ്പെടുന്നു. എന്നാൽ, പോലീസ് ഔദ്യോഗികമായി വിവരങ്ങൾ സ്‌ഥിരീകരിച്ചിട്ടില്ല.
ഇന്ന് പുലർച്ചെ ആയിരുന്നു സംഭവം. പാലക്കാട് നഗരസഭാ പരിധിയിൽ പുതുപ്പള്ളി തെരുവ് പൂളക്കാട് സുലൈമാൻ എന്നയാളിന്റെ വീട്ടിലാണ് ദാരുണമായ കൊലപാതകം നടന്നത്. സുലൈമാന്റെ ഭാര്യയാണ് ഷാഹിദ. ഇവരുടെ മൂന്ന് മക്കളിൽ ഇളയ മകനാണ് ആമിൽ.
വിവരമറിഞ്ഞ പോലീസ് ഉടൻ തന്നെ സ്‌ഥലത്തെത്തി ഷാഹിദയെ കസ്‌റ്റഡിയിൽ എടുത്തു.
Also Read: ശബരിമല: യാതൊരുവിധ അവ്യക്‌തതയും നിലനിൽക്കുന്നില്ല; വിജയരാഘവൻ
