തിരുവനന്തപുരം: വെസ്റ്റ് നൈൽ പനി ആശങ്ക ഉയർത്തുന്ന സാഹചര്യത്തിൽ നിർദ്ദേശങ്ങളുമായി ആരോഗ്യമന്ത്രി വീണാ ജോർജ്. പനിയെ പ്രതിരോധിക്കാൻ കൊതുക് നശീകരണം അനിവാര്യമാണെന്നും ആശങ്കപ്പെടേണ്ട സാഹചര്യമില്ലെന്നും മന്ത്രി പറഞ്ഞു. മന്ത്രിയുടെ നേതൃത്വത്തിൽ നേരത്തെ സ്ഥിതിഗതികൾ വിലയിരുത്തിയിരുന്നു.
ജപ്പാൻ ജ്വരത്തിന് സമാനമായ രോഗലക്ഷണങ്ങളാണ് വെസ്റ്റ് നൈൽ പനിക്കുമുള്ളത്. എന്നാൽ, ജപ്പാൻ ജ്വരത്തെ പോലെ ഇത് ഗുരുതരമാകാറില്ല. ക്യൂലക്സ് കൊതുക് പരത്തുന്ന ഒരു പകര്ച്ചവ്യാധിയാണ് വെസ്റ്റ് നൈല് പനി. ജപ്പാന് ജ്വരം സാധാരണ 18 വയസിന് താഴെയുള്ള കുട്ടികളെയാണ് ബാധിക്കുന്നതെങ്കില് വെസ്റ്റ് നൈല് പനി മുതിര്ന്നവരിലാണ് കാണുന്നത്. രണ്ടും കൊതുകുവഴി പകരുന്ന രോഗമാണ്.
അതിനാൽ, പ്രതിരോധ പ്രവര്ത്തനങ്ങള് ശക്തമാക്കണം. കൊതുകിന്റെ ഉറവിട നശീകരണത്തിന് പ്രാധാന്യം നല്കണം. വ്യക്തികള് വീടും പരിസരവും വൃത്തിയായി സൂക്ഷിക്കണം. വെള്ളം കെട്ടിനില്ക്കാതെ നോക്കണം. പനിയോ മറ്റ് രോഗലക്ഷണങ്ങളോ ഉണ്ടെങ്കില് ഉടന് തന്നെ ചികിൽസ തേടേണ്ടതാണെന്നും മന്ത്രി പറഞ്ഞു.
തലവേദന, പനി, പേശിവേദന, തലചുറ്റല്, ഓർമ നഷ്ടപ്പെടല് എന്നിവയാണ് പ്രധാന രോഗലക്ഷണങ്ങള്. രോഗബാധയുണ്ടായ ഭൂരിപക്ഷം പേരിലും പലപ്പോഴും രോഗലക്ഷണങ്ങള് പ്രകടമായി അനുഭവപ്പെടാറില്ല. ചിലര്ക്ക് പനി, തലവേദന, ഛർദ്ദി, ചൊറിച്ചില് തുടങ്ങിയ ലക്ഷണങ്ങള് കാണാം. ഒരു ശതമാനം ആളുകളില് തലച്ചോറിനെ ബാധിക്കുന്നത് മൂലം ബോധക്ഷയവും ചിലപ്പോള് മരണം വരെയും സംഭവിക്കാം. എന്നാല് ജപ്പാന് ജ്വരത്തെ അപേക്ഷിച്ച് താരതമ്യേന മരണനിരക്ക് കുറവാണ്.
തൃശൂര് ജില്ലയില് വെസ്റ്റ് നൈല് രോഗബാധ സംശയിച്ചപ്പോള് തന്നെ ജില്ലാ മെഡിക്കല് ഓഫിസിൽ നിന്നുള്ള പ്രത്യേക സംഘം രോഗിയുടെ പ്രദേശമായ കണ്ണറ സന്ദര്ശിച്ച് പ്രതിരോധ പ്രവര്ത്തനങ്ങള് ശക്തമാക്കി. ജില്ലാ വെക്ടർ കണ്ട്രോള് യൂണിറ്റ് വിവിധ ഭാഗങ്ങളില് നിന്നും സാമ്പിളുകള് ശേഖരിച്ച് പരിശോധനക്ക് അയച്ചു. കൊതുകുജന്യ രോഗങ്ങള്ക്ക് സാധ്യതയുള്ള പ്രദേശമാണെന്ന് കണ്ടെത്തിയതിനാല് എല്ലാ ടീം അംഗങ്ങളും രോഗിയുടെ വീട്ടിലും പരിസരത്തും കൊതുകിന്റെ ഉറവിടനശീകരണ പ്രവർത്തനങ്ങൾ നടത്തി.
വെസ്റ്റ് നൈല് രോഗത്തിന് ശരിയായ ചികിത്സയോ വാക്സിനോ ലഭ്യമല്ലാത്തതിനാല് പ്രതിരോധമാണ് പ്രധാനം. കൊതുകുകടി എല്ക്കാതിരിക്കുകയാണ് എറ്റവും നല്ല പ്രതിരോധ മാർഗം. ശരീരം മൂടുന്ന വിധത്തില് വസ്ത്രം ധരിക്കുക, കൊതുകുവല ഉപയോഗിക്കുക, കൊതുകിനെ അകറ്റുന്ന ലേപനങ്ങള് പുരട്ടുക, കൊതുകുതിരി, കറന്റില് പ്രവര്ത്തിക്കുന്ന കൊതുക് നശീകരണ ഉപകരണങ്ങള് എന്നിവ ഉപയോഗിക്കുന്നത് ഫലപ്രദമാണ്. കൂടാതെ കൊതുകിന്റെ ഉറവിടനശീകരണവും പ്രധാനമാണ്. സ്വയം ചികിൽസ രോഗത്തെ സങ്കീര്ണമാക്കും. ആരംഭത്തില് തന്നെ ചികിൽസിച്ചാല് ഭേദമാക്കാവുന്നതാണ്.
Most Read: അറ്റുപോയ വിരലുകളുമായി കുട്ടി ചികിൽസക്ക് കാത്തുനിന്നത് 36 മണിക്കൂർ; ഗുരുതര വീഴ്ച