ന്യൂഡെല്ഹി: ത്രിപുര മുഖ്യമന്ത്രി ബിപ്ളബ് ദേബിനെതിരെ പാളയത്തില് പട, സ്ഥാനത്ത് നിന്നും മാറ്റണം എന്നാവശ്യപ്പെട്ട് 7 ബിജെപി എംഎല്എമാര് ഡെല്ഹിയില്. പാര്ട്ടിയുടെ കേന്ദ്ര നേതൃത്വത്തെ നേരിട്ട് കണ്ട് ആവശ്യം അറിയിക്കാനാണ് ഇവരുടെ തീരുമാനം. ദേശീയ അദ്ധ്യക്ഷന് ജെപി നഡ്ഡയേയും ആഭ്യന്തര മന്ത്രി അമിത് ഷായേയും ഇവര് അടുത്ത ദിവസങ്ങളില് തന്നെ കണ്ടേക്കും.
2018-ലെ തിരഞ്ഞെടുപ്പില് പാര്ട്ടിയുടെ വിജയത്തിന് വേണ്ടി പ്രയത്നിച്ച മുതിര്ന്ന നേതാക്കളെ പോലും മുഖവിലക്ക് എടുക്കാതെയാണ് മുഖ്യമന്ത്രിയുടെ പ്രവര്ത്തനം, സഹപ്രവര്ത്തകരുടെ വാക്കുകള് പരിഗണിക്കുന്നില്ല എന്നീ ആരോപണങ്ങളാണ് ബിപ്ളബ് ദേബിനെതിരെ ഇവര് ഉന്നയിക്കുന്നത്.
പാര്ട്ടിയുമായി തങ്ങള്ക്ക് യാതൊരു അഭിപ്രായ വ്യത്യാസങ്ങളും ഇല്ലെന്നും പാര്ട്ടിയില് ഉറച്ചു നില്ക്കുമെന്നും വിമത നീക്കം നടത്തുന്ന എംഎല്എമാര് അറിയിച്ചു.
എംഎല്എ സുദീപ് റോയ് ബര്മന്റെ നേതൃത്വത്തിലാണ് വിമത നീക്കം നടക്കുന്നത്. മുഖ്യമന്ത്രി ഏകാധിപതിയെ പോലെ പെരുമാറുന്നുവെന്നും, കൂടുതല് എംഎല്എമാര്ക്ക് എതിര്പ്പുണ്ടെന്നും അവര് തനിക്കൊപ്പം ഉണ്ടെന്നും റോയ് പറഞ്ഞു. 36 സീറ്റുള്ള ബിജെപിക്ക് ഭരണം നിലനിര്ത്താന് ഇവരുടെ സാന്നിധ്യം അനിവാര്യമാണ് എന്നതിനാല് ത്രിപുരയില് കാര്യങ്ങള് കൂടുതല് ഗൗരവമാകുകയാണ്.
Read Also: ഹത്രസ്; പെണ്കുട്ടിയുടെ കുടുംബം ഇന്ന് കോടതിയിലേക്ക്