കയ്പമംഗലം: തൃശൂർ പെരിഞ്ഞനത്ത് നിയന്ത്രണം വിട്ട കാർ വൈദ്യുതി ട്രാൻസ്ഫോർമറിൽ ഇടിച്ച് കത്തി നശിച്ചു. അപകടത്തിൽ ഒരാൾക്ക് ഗുരുതര പരിക്കേറ്റു. ഇന്ന് പുലർച്ചെ ഒരുമണിയോടെയാണ് സംഭവം.
പത്തനംതിട്ട തിരുവല്ല സ്വദേശികളായ 5 പേർ വയനാട് പോയി തിരിച്ചു വരുന്ന വഴിക്കാണ് അപകടം നടന്നത്. ദേശീയപാത 66ൽ പെരിഞ്ഞനം പഞ്ചായത്ത് വളവിൽ നിയന്ത്രണം വിട്ട സ്കോർപ്പിയോ കാർ ട്രാൻസ്ഫോർമറിൽ ഇടിച്ച് തീ പിടിക്കുകയായിരുന്നു. ഉടൻ തന്നെ പരിക്കേറ്റയാളെ പുറത്തെടുത്ത് ആശുപത്രിയിലേക്ക് മാറ്റി. കാറിൽ നിന്നും തീ ആളിക്കത്തിയതോടെ ട്രാൻസ്ഫോർമറിനും തീ പിടിച്ചു. തുടർന്ന് ഇരിങ്ങാലക്കുടയിൽ നിന്നും ഫയർഫോഴ്സ് എത്തിയാണ് തീയണച്ചത്. അപകടത്തിൽപ്പെട്ട കാർ പൂർണമായും കത്തിനശിച്ചു.
കാറിൽ ഉണ്ടായിരുന്ന പത്തനംതിട്ട തിരുവല്ല സ്വദേശി കുമ്പനാട് കോളിൻസ് വിനോജ് (21) എന്നയാൾക്ക് തലക്ക് പരിക്കേറ്റതിനെ തുടർന്ന് എറണാകുളം ലിസി ആശുപത്രിൽ പ്രവേശിപ്പിച്ചു. പത്തനംതിട്ട സ്വദേശികളായ ജസ്റ്റിൻ കെ ജോൺസൺ (25), ബിജോ (23), ജോയൽ (21), ടിറ്റു എം ജോൺ (28) എന്നിവർക്ക് സാരമായി പരിക്കേറ്റിട്ടുണ്ട്. കയ്പമംഗലം പോലീസ് സ്ഥലത്തെത്തി പരിശോധന നടത്തി.
Read also: പൊന്നാനി ഫിഷിങ് ഹാർബറിൽ ജനുവരി 1 മുതൽ ടോൾ നൽകണം