മുതലമട: യുവാവിനെ മാരകായുധങ്ങളുമായി ആക്രമിച്ച കേസിൽ നാലുപേർ അറസ്‌റ്റിൽ. കാമ്പ്രത്ത്‌ചള്ള സ്വദേശി ശരൺ (28), പോത്തമ്പാടം പെരുംചിറ സ്വദേശികളായ ബിജു മോൻ (30), ഷിബി (26), അടമ്പമരം സ്വദേശി ബൈജു (23) എന്നിവരെയാണ് കൊല്ലങ്കോട് പോലീസ് അറസ്‌റ്റ് ചെയ്‌തത്‌. കഴിഞ്ഞ മാസം 29ന് പള്ളം സ്വദേശിയായ സുബൈറിനെ (30) ആക്രമിച്ച കേസിലാണ് പ്രതികളെ പിടികൂടിയത്.
29ന് രാത്രി ഒൻപത് മണിക്കാണ് കേസിനാസ്‌പദമായ സംഭവം നടന്നത്. കാമ്പ്രത്ത്‌ചള്ള പള്ളം റോഡിലൂടെ ബൈക്കിൽ സഞ്ചരിക്കുകയായിരുന്ന സുബൈറിനെ രണ്ടു ബൈക്കുകളിലായി എത്തിയ പ്രതികളാണ് ആക്രമിച്ചത്. മാരകായുധങ്ങളുമായി എത്തിയ സംഘം നിലംപൊതി പാലത്തിന് സമീപത്തുവെച്ച് സുബൈറിന്റെ ബൈക്ക് ഇടിച്ചു വീഴ്‌ത്തി ആക്രമിക്കുകയായിരുന്നുവെന്ന് പോലീസ് പറഞ്ഞു.
സുബൈറിന്റെ ബൈക്ക് സംഘം തല്ലിത്തകർത്തിട്ടുണ്ട്. ചിറ്റൂർ കോടതിയിൽ ഹാജരാക്കിയ പ്രതികളെ റിമാൻഡ് ചെയ്‌തു. സംഭവത്തിൽ കൂടുതൽ അന്വേഷണം നടത്തുമെന്ന് കൊല്ലങ്കോട് പോലീസ് അറിയിച്ചു.
Read Also: ഇത്തവണ ഓണാഘോഷം വെർച്വലായി; പദ്ധതികളുമായി ടൂറിസം വകുപ്പ്
