വടക്കാഞ്ചേരി ലൈഫ് മിഷന് പദ്ധതിയില്‍ അഴിമതി നടന്നിട്ടുണ്ടെന്ന് സിബിഐ ഹൈക്കോടതിയില്‍. കേസ് അന്വേഷണം ചോദ്യം ചെയ്‌ത്‌ പദ്ധതിയുടെ നിര്‍മാതാക്കളായ യുണിടാക് എം.ഡി സന്തോഷ് ഈപ്പന്‍ നല്‍കിയ ഹരജിയിലാണ് സിബിഐ വിശദീകരണം. കേസില്‍ സിബിഐ അന്വേഷണത്തിന് സ്റ്റേ നല്‍കണമെന്ന ഹരജിക്കാരന്റെ ആവശ്യം കോടതി തള്ളി.
കേന്ദ്ര അനുമതിയില്ലാതെ ഫണ്ട് വാങ്ങാന്‍ കഴിയില്ലെന്ന് സിബിഐ കോടതിയെ അറിയിച്ചു. ലൈഫ് മിഷന് ഉദ്യോഗസ്ഥര്‍ ഈ പദ്ധതിയുമായി ബന്ധപ്പെട്ട് പണം വാങ്ങിയോ എന്ന് പരിശോധിച്ച് വരികയാണെന്നും സിബിഐ കോടതിയെ അറിയിച്ചു. വ്യാഴായ്ച്ച കേസ് വീണ്ടും കോടതി പരിഗണിക്കും. സന്തോഷ് ഈപ്പന്‍ ഫോണ്‍ നല്‍കിയതിലും പണം നല്‍കിയതിലും അഴിമതിയുണ്ട് എന്നാണ് സിബിഐ കോടതിയില്‍ വാദിച്ചത്.
സ്വപ്‌ന സുരേഷിന് സന്തോഷ് ഈപ്പന്‍ കമ്മീഷന്‍ നല്‍കിയതും കൈക്കൂലിയായി കണക്കാക്കണം. ലൈഫ് മിഷനിലെ ഏതെങ്കിലും ഉദ്യോഗസ്ഥര്‍ കൈക്കൂലിയായി പണം വാങ്ങിയോ എന്ന കാര്യം വിശദമായ അന്വേഷണത്തിലൂടെ മാത്രമേ വ്യക്തമാകൂ. അതിനാല്‍ ഇക്കാര്യത്തില്‍ അന്വേഷണം സ്റ്റേ ചെയ്യണമെന്ന ഹരജിക്കാരന്റെ ആവശ്യം തള്ളണമെന്നും സിബിഐ ഹൈക്കോടതിയില്‍ വാദിച്ചു.
സന്തോഷ് ഈപ്പന്റെ കൈക്കൂലിയുമായി ബന്ധപ്പെട്ട് വിശദമായ അന്വേഷണം നടന്നുകൊണ്ടിരിക്കുക ആണെന്നും, ലൈഫ് മിഷന് സി.ഇ.ഒ യു.വി ജോസ് അടക്കമുള്ളവരെ ചോദ്യം ചെയ്യുന്നത് തുടരുകയാണെന്നും സിബിഐ കോടതിയില്‍ പറഞ്ഞു. കേസില്‍ വ്യാഴായ്ച്ച വിശദമായി വാദം കേള്‍ക്കുമെന്ന് കോടതി വ്യക്തമാക്കി. അന്ന് ലൈഫ് മിഷന് വേണ്ടി സംസ്ഥാന സര്‍ക്കാര്‍ ഹൈക്കോടതിയില്‍ നല്‍കിയ ഹരജി പരിഗണിക്കുന്നുണ്ട്. അന്ന് തന്നെ സന്തോഷ് ഈപ്പന്റെ ഈ ഹരജിയും കോടതി പരിഗണിക്കും.
Read Also: വയനാട് തുരങ്കപാത; മുഖ്യമന്ത്രി നിര്‍മ്മാണ ഉല്‍ഘാടനം നിര്‍വഹിച്ചു
