മലപ്പുറം: കുറ്റിപ്പുറം എംഇഎസ് എഞ്ചിനിയറിങ് കോളേജിൽ ഉണ്ടായ സംഘർഷത്തിൽ നിരവധി വിദ്യാർഥികൾക്ക് പരിക്ക്. കോളേജിലെ സിവിൽ-മെക്കാനിക്കൽ വിഭാഗങ്ങൾ തമ്മിലാണ് സംഘർഷം ഉണ്ടായത്. മെക്കാനിക്കൽ വിഭാഗത്തിലെ ഒരു വിദ്യാർഥിയുടെ കൈവിരലിന്റെ എല്ല് പൊട്ടുകയും മറ്റ് നാല് പേർക്ക് പരിക്കേൽക്കുകയും ചെയ്തു.
സംഭവത്തിൽ പോലീസ് മൂന്ന് പേരെ അറസ്റ്റ് ചെയ്തു. നടുവട്ടം കൊളത്തോൾ ഒറുവിൽ അജ്മൽ(21), കണ്ണൂർ മൻഹൽ ആസ് (21), മങ്കട വെള്ളില സൗപർണിക വീട്ടിൽ ധീരജ് (21) എന്നിവരെയാണ് പിടികൂടിയത്. ഒളിവിലുള്ള മറ്റ് പ്രതികൾക്ക് വേണ്ടി പോലീസ് തിരച്ചിൽ ഊർജിതമാക്കിയിട്ടുണ്ട്. അറസ്റ്റിലായവർ എല്ലാവരും സിവിൽ എഞ്ചിനിയറിങ് വിദ്യാർഥികളാണ്.
കോളേജിലെ വിദ്യാർഥികൾ തമ്മിലും നാട്ടുകാരുമായും പല തവണയായി സംഘർഷം ഉണ്ടായിരുന്നു. ഇതേത്തുടർന്നാണ് പോലീസ് നടപടികൾ കർശനമാക്കിയത്. കോളേജിന്റെ പ്രവർത്തനം പ്രദേശത്തെ ക്രമാസമാധാനത്തിന് ഭീഷണിയായാൽ സിആർപിസി 143 വകുപ്പ് പ്രകാരം കോളേജിനെതിരെ ജില്ലാ കളക്ടർക്ക് റിപ്പോർട് നൽകുമെന്നും പോലീസ് അറിയിച്ചു.
Most Read: തൃക്കാക്കരയിൽ സിപിഐഎമ്മിന്റെ അടക്കം വോട്ടുകൾ യുഡിഎഫിന് കിട്ടി; വിഡി സതീശൻ