ന്യൂഡെൽഹി : ഇന്ത്യയിലും യുകെയിലും കണ്ടെത്തിയ കോവിഡ് വകഭേദങ്ങൾക്ക് കൊവാക്‌സിൻ ഫലപ്രദമാണെന്ന് വ്യക്‌തമാക്കി ഭാരത് ബയോടെക്. നാഷണൽ ഇൻസ്‌റ്റിറ്റ്യൂട്ട് ഓഫ് വൈറോളജി, ഇന്ത്യൻ കൗൺസിൽ ഓഫ് മെഡിക്കൽ റിസർച്ച് എന്നിവ സഹകരിച്ച് നടത്തിയ പഠനത്തിലാണ് പുതിയ കണ്ടെത്തൽ. ഇത് സംബന്ധിച്ച് മെഡിക്കൽ ജേണലായ ക്ളിനിക്കൽ ഇൻഫെക്ഷിയസ് ഡിസീസസിൽ പ്രസിദ്ധീകരിച്ച ഒരു പഠനം ഭാരത് ബയോടെക് ജോയിന്റ് മാനേജിംഗ് ഡയറക്‌ടർ ട്വിറ്ററിൽ പങ്കുവെച്ചു.
പരീക്ഷിച്ച എല്ലാ പ്രധാന വകഭേദങ്ങളേയും കൊവാക്‌സിൻ നിർവീര്യമാക്കുന്നുവെന്ന് ഭാരത് ബയോടെക് അറിയിച്ചു. ബി1617, ബി117 എന്നിവ ഉൾപ്പെടെയുള്ള കോവിഡ് വൈറസിന്റെ പ്രധാന വകഭേദങ്ങൾക്കെതിരെ കൊവാക്‌സിൻ ഫലപ്രദമാണെന്ന് അവർ കൂട്ടിച്ചേർത്തു.
കോവിഡിനെതിരെ ഇന്ത്യയിൽ വികസിപ്പിച്ച വാക്‌സിനാണ് കൊവാക്‌സിൻ. ഐസിഎംആറും നാഷണൽ ഇൻസ്‌റ്റിറ്റ്യൂട്ട് ഓഫ് വൈറോളജിയും ചേർന്നാണ് കൊവാക്‌സിൻ വികസിപ്പിച്ചെടുത്തത്.
Read also : അതിതീവ്ര ചുഴലിയായി ടൗട്ടെ; ഗോവയിൽ കനത്ത മഴ തുടരുന്നു; ആയിരങ്ങളെ മാറ്റിപ്പാർപ്പിച്ചു
