പനമരം: കോവിഡ് സ്‌ഥിരീകരിച്ചിട്ടും ഭാര്യയെ ഡ്രൈവിങ് പഠിപ്പിക്കാൻ വാഹനമെടുത്ത് ഇറങ്ങിയ ആൾക്കെതിരെ കേസെടുത്ത് പോലീസ്. കോവിഡ് പോസിറ്റീവായി നിരീക്ഷണത്തിൽ കഴിയവേ പുറത്തിറങ്ങിയ കേണിച്ചിറ താഴെമുണ്ട സ്വദേശിക്കെതിരെയാണ് കേണിച്ചിറ പോലീസ് കേസ് എടുത്തത്. പകർച്ചവ്യാധി നിയന്ത്രണ നിയമപ്രകാരം കേസെടുത്ത പോലീസ് ലോക്ക്ഡൗൺ ലംഘിച്ചതിനും ഇയാൾക്കെതിരെ നടപടിയെടുത്തു.
കോവിഡ് പോസിറ്റീവായവർ പ്രോട്ടോക്കോൾ പാലിക്കുന്നുണ്ടോയെന്ന് നിരീക്ഷിക്കുന്നതിന്റെ ഭാഗമായി താഴെമുണ്ട സ്വദേശിയുടെ വീട്ടിൽ പോലീസ് എത്തിയപ്പോൾ ഇയാൾ ഉണ്ടായിരുന്നില്ല. ഇയാളെ അന്വേഷിച്ച പോലീസിനോട് പരസ്‌പര വിരുദ്ധമായ മറുപടിയാണ് ബന്ധുക്കൾ നൽകിയത്.
സംശയം തോന്നിയ പോലീസ് രോഗിയെ ഫോണിൽ വിളിച്ചപ്പോൾ കോവിഡ് പരിശോധനക്ക് പുറത്തു പോയതാണ് എന്നായിരുന്നു മറുപടി. ഈ മറുപടി വിശ്വാസ്യ യോഗ്യമല്ലാത്തതിനെ തുടർന്ന് നടത്തിയ തിരച്ചിലിലാണ് ഇയാൾ പൊതുനിരത്തിൽ ഭാര്യയെ ഡ്രൈവിങ് പഠിപ്പിക്കുന്നതായി കണ്ടെത്തിയത്.
Also Read: കോവിഡ് പ്രതിരോധത്തിനായി 1.15 കോടി രൂപ മാറ്റിവെക്കും; മലപ്പുറം നഗരസഭ
