കോഴിക്കോട്: ജില്ലയിലെ സ്വകാര്യ ലാബുകളില് കോവിഡ് പരിശോധനക്ക് തോന്നുംപടി ഫീസ് ഈടാക്കുന്നതായി പരാതി. സ്വാകാര്യ ലാബുകള്ക്ക് പുറമേ ആശുപത്രികളിലെ ലാബുകളിലും സമാന സ്ഥിതിയാണുള്ളത്. ആന്റിജന് പരിശോധനക്ക് 625 രൂപയും ആര്ടിപിസിആര് പരിശോധനക്ക് 2750 രൂപയുമാണ് സര്ക്കാര് നിശ്ചയിച്ച നിരക്ക്.
എന്നാല് പല സ്വകാര്യ ലാബുകളിലും ഇതിനേക്കാള് അധികമാണ് ഈടാക്കുന്ന തുക. ജില്ലയിലെ ലാബുകളില് പരിശോധന ഫീസുകള്ക്ക് ഏകീകൃത സ്വഭാവമില്ലെന്ന് തുടക്കത്തിലേ പരാതികള് ഉയര്ന്നിരുന്നു.
ജില്ലയില് തന്നെ ചില സ്വകാര്യ ലാബുകളില് സര്ക്കാര് നിരക്ക് തന്നെയാണ് ഈടാക്കുന്നത്. എന്നാല് മറ്റു പലയിടത്തും ആന്റിജന് പരിശോധനക്ക് ആയിരം രൂപയില് അധികം ഈടാക്കുന്നു.
കോവിഡ് ഇതര ചികില്സക്ക് എത്തുന്ന രോഗികള്ക്കും സ്വകാര്യ ആശുപത്രികളില് കോവിഡ് പരിശോധന നിര്ബന്ധമാക്കി. സ്വന്തമായി പരിശോധിക്കാന് സൗകര്യമില്ലാത്ത ലാബുകള് കൂടുതല് ഫീസ് വാങ്ങി മറ്റിടങ്ങളിലേക്ക് അയക്കുന്നു. ഇതിനായി 4000 രൂപ വരെ ഈടാക്കുന്ന ലാബുകളുണ്ട്.
സംസ്ഥാനത്തെ കോവിഡ് പരിശോധനയുടെ പകുതിയോളം സ്വകാര്യ ലാബുകളിലാണ് നടക്കുന്നത്. ദിവസം പതിനായിരത്തില് അധികം പിസിആര് പരിശോധനകളും, പതിനേഴായിരത്തില് അധികം ആന്റിജന് പരിശോധനകളും സ്വകാര്യ ലാബുകളില് നടക്കുന്നുണ്ട്.
More Kozhikode News: കോഴിക്കോട് ജില്ലയില് കോവിഡ് ബാധിക്കുന്നവരില് ഏറെയും യുവാക്കള്