മലപ്പുറം: വെട്ടം പഞ്ചായത്തിലെ ക്ഷേമകാര്യ സമിതി അധ്യക്ഷ സ്ഥാനം മണിക്കൂറുകൾക്കുള്ളിൽ സിപിഎം അംഗം രാജിവെച്ചു. ജമാഅത്തെ ഇസ്ലാമിയുടെ വെൽഫെയർ പാർട്ടി പിന്തുണയോടെ ജയിച്ച സിപിഎം അംഗം കെടി റുബീനയാണ് ക്ഷേമകാര്യ സമിതി ചെയർപേഴ്സൺ സ്ഥാനം തിരഞ്ഞെടുപ്പിന് ശേഷം മണിക്കൂറുകൾക്കുള്ളിൽ രാജിവെച്ചത്.
സിപിഎം ജില്ലാ നേതൃത്വം ഇടപെട്ടതോടെയായിരുന്നു രാജി. സിപിഎം- വെല്ഫെയര് പാര്ട്ടി ബാന്ധവം വർത്തയാകുകയും സംസ്ഥാന വ്യാപകമായി ചർച്ചയാകുകയും ചെയ്ത സാഹചര്യത്തിലാണ് ജില്ലാ നേതൃത്വം ഇടപെട്ടത്.
ക്ഷേമകാര്യ സമിതിയിൽ അഞ്ച് അംഗങ്ങളാണുള്ളത്. എൽഡിഎഫിന് രണ്ട്, യുഡിഎഫിന് രണ്ട്, വെൽഫെയർ പാർട്ടിക്ക് ഒന്ന് എന്നിങ്ങനെയായിരുന്നു അംഗങ്ങൾ. വെൽഫെയർ പാർട്ടി അംഗത്തിന്റെ വോട്ട് കിട്ടിയതോടെ രണ്ടിനെതിരെ മൂന്ന് വോട്ടുകൾക്ക് ആണ് സിപിഎം അംഗം ചെയർപേഴ്സണായി തിരഞ്ഞെടുക്കപ്പെട്ടത്.
Malabar News: വയനാട് ചുരം റോഡ് നവീകരണം; ടാറിങ് പുരോഗമിക്കുന്നു