കോഴിക്കോട്: സംസ്‌ഥാനത്ത്‌ കോവിഡ് വ്യാപനം രൂക്ഷമായ സാഹചര്യത്തിൽ തൃശൂർ പൂരം നടത്തുന്നതിന് എതിരെ രൂക്ഷ വിമർശനവുമായി സംവിധായകൻ ഡോ. ബിജു. ഭരണാധികാരികൾക്കും രാഷ്‌ട്രീയക്കാർക്കും ഉൽസവപ്രേമികൾക്കും എതിരെ രൂക്ഷമായ ഭാഷയിലാണ് ഡോ. ബിജു തന്റെ ഫേസ്ബുക്ക് പോസ്‍റ്റിലൂടെ പ്രതികരിച്ചത്.
‘ഇലക്ഷൻ മാമാങ്കം കഴിഞ്ഞു. ഇനി, അവിടെ കുംഭ മേള ഇവിടെ തൃശൂർ പൂരം. എന്തു മനോഹരമായ നാട്. ഏതു നൂറ്റാണ്ടിലാണാവോ ഈ മനുഷ്യൻമാരും ഭരണാധികാരികളും രാഷ്‌ട്രീയക്കാരും ഉൽസവപ്രേമികളും ജീവിക്കുന്നത്. ഇവരൊക്കെയാണ് യഥാർഥ വൈറസുകൾ. കൊറോണ വൈറസ് ഇവർക്ക് മുൻപിൽ തലകുനിക്കണം’, ഡോ. ബിജു പറയുന്നു.
കോവിഡ് കാലത്ത് കുംഭമേള അടക്കം പൊതുപരിപാടികൾ നടത്തുന്നതിനെതിരെ നടി പാർവതി തിരുവോത്ത്, നടൻ ഹരീഷ് പേരടി അടക്കമുള്ളവർ പ്രതികരിച്ചിരുന്നു. തബ് ലീഗ് സമ്മേളനത്തെ വിമർശിച്ച മാദ്ധ്യമങ്ങൾ കുംഭമേളയോട് നിശബ്‌ദത പാലിക്കുന്നു എന്നായിരുന്നു പാർവതിയുടെ വിമർശനം.
‘കുംഭമേളയും തൃശൂർ പൂരവും തിരഞ്ഞെടുപ്പ് പ്രചാരണവും ഏല്ലാം എനിക്ക് ഒരു പോലെയാണന്ന് കൊറോണ. എന്നെ സംബന്ധിച്ച് ഏത് മതമായാലും ഏത് രാഷ്‌ട്രീയമായാലും ഏത് ജാതിയായാലും ഏത് നിറമായാലും നിങ്ങളൊക്കെ വെറും മനുഷ്യ കീടങ്ങൾ, അത്രയേയുള്ളു. സൂക്ഷിച്ചാൽ നിങ്ങൾക്ക് നല്ലത്. എന്ന് വീണ്ടും കൊറോണ’, ഹരീഷ് പേരടി പറഞ്ഞു.
Read also: ശബരിമലയിലേതു പോലെ മടിച്ചു നിൽക്കരുത്, തൃശൂർ പൂരം ഒഴിവാക്കണം; സർക്കാരിനോട് എൻഎസ് മാധവൻ
