തിരുവനന്തപുരം : ഇത്തവണത്തെ കേരള രാജ്യാന്തര ചലച്ചിത്രമേള ഡിസംബറില്‍ നടത്താനായില്ലെങ്കില്‍ ജനുവരിയിലോ ഫെബ്രുവരിയിലോ നടത്തുമെന്ന് മന്ത്രി എ കെ ബാലന്‍. കോവിഡ് രൂക്ഷമായി തുടര്‍ന്നാല്‍ ഓണ്‍ലൈന്‍ മേള എന്ന ആശയം പരിഗണിക്കുമെന്നും അദ്ദേഹം കൂട്ടിച്ചേര്‍ത്തു.
മേളയുടെ പ്രാരംഭ പ്രവര്‍ത്തനങ്ങള്‍ ഇതിനോടകം തന്നെ ആരംഭിച്ചു കഴിഞ്ഞു. സംസ്ഥാന ചലച്ചിത്ര അവാര്‍ഡ് നിര്‍ണയത്തിനുള്ള നടപടികളും ആരംഭിച്ചിട്ടുണ്ട്. ഒപ്പം തന്നെ സംസ്ഥാന ടെലിവിഷന്‍ അവാര്‍ഡിനുള്ള എന്‍ട്രികളും സ്വീകരിച്ചു കഴിഞ്ഞു.
ഓഗസ്റ്റ് 21 മുതല്‍ 28 വരെയുള്ള തീയതികളില്‍ ചലച്ചിത്ര അക്കാദമിയുടെ നേതൃത്വത്തില്‍ ഡോക്യുമെന്ററി-ഹ്രസ്വചിത്രമേള ഓണ്‍ലൈനായി നടത്തും.29 സിനിമകളായിരിക്കും ഇതില്‍ പ്രദര്‍ശിപ്പിക്കുക. 14 ഡോക്യൂമെന്ററികളും, 5 ഹ്രസ്വചിത്രങ്ങളും, 4 കാമ്പസ് സിനിമകളും, 6 ആനിമേഷന്‍ സിനിമകളുമാണ് ഇതിലുള്‍പ്പെടുന്നത്. ഇവയില്‍ ഏഴെണ്ണം വിദേശചിത്രങ്ങളുമാണ്. ഡോക്യുമെന്ററി-ഹ്രസ്വചിത്രമേളയുടെ രജിസ്‌ട്രേഷന്‍ ആരംഭിച്ചിട്ടുണ്ട്. രജിസ്റ്റര്‍ ചെയ്ത ആളുകള്‍ക്ക് വൈകിട്ട് 4 മണി മുതല്‍ 24 മണിക്കൂറിനകം സിനിമകള്‍ കാണാന്‍ സാധിക്കും.
