ന്യൂഡെൽഹി: 2020-21 സാമ്പത്തിക വർഷത്തിൽ ഇതുവരെ മൂന്ന് കോടിയിലധികം ആദായ നികുതി റിട്ടേണുകൾ ഫയൽ ചെയ്തിട്ടുണ്ടെന്ന് കേന്ദ്ര ധനമന്ത്രാലയം. ഇതുവരെ റിട്ടേൺ ഫയൽ ചെയ്യാത്ത നികുതിദായകരോട് എത്രയും വേഗം അത് ചെയ്യണമെന്ന് ധനമന്ത്രാലയം ഞായറാഴ്ച ആവശ്യപ്പെട്ടു.
പ്രതിദിനം ഫയൽ ചെയ്യുന്ന ഐടിആറുകളുടെ എണ്ണം നാല് ലക്ഷത്തിൽ ഏറെയാണ്. കോവിഡ് വ്യാപനത്തെ തുടർന്നാണ് ഐടിആർ ഫയൽ ചെയ്യാനുള്ള തീയതി പലപ്പോഴായി നീട്ടി നൽകിയത്.
ഡിസംബർ 31 ആണ് ഐടിആർ ഫയൽ ചെയ്യാനുള്ള അവസാന തീയതി. ഈ തീയതി അടുത്തു വരുന്നതിനാൽ അനുദിനം ഐടിആർ ഫയൽ ചെയ്യുന്നവരുടെ എണ്ണം വർധിച്ചു കൊണ്ടിരിക്കുകയാണെന്ന് മന്ത്രാലയം പുറത്തുവിട്ട പ്രസ്താവനയിൽ പറയുന്നു.
കൂടുതൽ കാലതാമസം കൂടാതെ ആദായനികുതി റിട്ടേൺ സമർപ്പിക്കാൻ നികുതിദായകരെ അറിയിക്കുന്ന ഇ-മെയിലുകൾ, എസ്എംഎസ്, മീഡിയ ക്യാംപയിനുകൾ എന്നിവ സംഘടിപ്പിക്കുന്നുണ്ട്. ഇതിലൂടെ പ്രക്രിയ കൂടുതൽ വേഗത്തിലാക്കാനാണ് ശ്രമം.
Read Also: സത്യത്തിൽ ആഭ്യന്തര മന്ത്രാലയം എന്താണ് ചെയ്യുന്നത് ? ചോദ്യവുമായി രാഹുൽ ഗാന്ധി