ന്യൂഡെൽഹി: രാജ്യത്ത് കഴിഞ്ഞ 24 മണിക്കൂറിനിടെ 7,145 പുതിയ കോവിഡ് കേസുകൾ റിപ്പോർട് ചെയ്തതായി കേന്ദ്ര ആരോഗ്യ കുടുംബക്ഷേമ മന്ത്രാലയം അറിയിച്ചു. 8,706 പേർ രോഗമുക്തി നേടിയപ്പോൾ 289 മരണങ്ങളും രാജ്യത്ത് റിപ്പോർട് ചെയ്യപ്പെട്ടു.
പുതിയ കേസുകളിൽ കൂടുതലും റിപ്പോർട് ചെയ്തിരിക്കുന്നത് കേരളത്തിലാണ്. 3,471 പേർക്കാണ് കേരളത്തിൽ കഴിഞ്ഞ ദിവസം കോവിഡ് സ്ഥിരീകരിച്ചത്. 54,715 സാമ്പിൾ പരിശോധനയ്ക്ക് വിധേയമാക്കി. രോഗമുക്തി നേടിയവർ 4,966 പേരും കോവിഡ് മരണം സ്ഥിരീകരിച്ചത് 22 പേർക്കുമാണ്.
നിലവിൽ 84,565 സജീവ കേസുകളാണ് രാജ്യത്തുള്ളത്. 569 ദിവസങ്ങൾക്കിടെ ആദ്യമായാണ് സജീവ കേസുകളുടെ എണ്ണം ഇത്രയും കുറയുന്നത്.
രാജ്യത്ത് ഇതുവരെ 3,41,71,471 പേരാണ് കോവിഡിൽ നിന്നും മുക്തി നേടിയത്. അതേസമയം രാജ്യത്ത് കോവിഡ് മൂലം ഇതുവരെ ജീവൻ നഷ്ടമായത് 4,77,158 പേർക്കാണ്.
രാജ്യത്ത് വാക്സിനേഷനും പുരോഗമിക്കുകയാണ്. 1,36,66,05,173 വാക്സിൻ ഡോസുകൾ രാജ്യത്തുടനീളം വിതരണം ചെയ്തതായി ആരോഗ്യ മന്ത്രലയത്തിന്റെ കണക്കുകൾ വ്യക്തമാക്കുന്നു.
Most Read: ഒമൈക്രോണിൽ അതിജാഗ്രതാ നിർദ്ദേശം; സ്വയംനിരീക്ഷണം കർശനമാക്കണം