കൊച്ചി: നടന് ഷാജോണും കുടുംബവും കോണ്ഗ്രസില് ചേര്ന്നെന്ന വാര്ത്തയോട് പ്രതികരിച്ച് താരം രംഗത്ത്. താന് ഒരു പാര്ട്ടിയിലും ചേര്ന്നിട്ടില്ലെന്നും ഇലക്ഷന് സമയങ്ങളില് കണ്ടുവരുന്ന വ്യാജ വാര്ത്തകള് ആരും വിശ്വസിക്കരുതെന്നും ഷാജോണ് ഫേസ്ബുക്കില് എഴുതി.
കഴിഞ്ഞ ദിവസമായിരുന്നു ഷാജോണും കുടുംബവും കോണ്ഗ്രസില് ചേര്ന്നതായുള്ള വാര്ത്തകള് സോഷ്യല് മീഡിയയില് പ്രചരിച്ചത്. ഇതിന് പിന്നാലെയാണ് വാർത്തയിൽ വ്യക്തത വരുത്തി ഷാജോണ് തന്നെ രംഗത്തെത്തിയത്.
ധര്മ്മജന്, മുകേഷ്, കൃഷ്ണകുമാര്, സുരേഷ് ഗോപി, ഗണേഷ് കുമാര് തുടങ്ങിയ താരങ്ങളാണ് സിനിമ മേഖലയിൽ നിന്ന് രാഷ്ട്രീയത്തിലേക്ക് ഇറങ്ങിത്തിരിച്ചത്. മൽസരരംഗത്തുള്ള താരങ്ങൾക്ക് വേണ്ടി സഹപ്രവർത്തകരും പ്രചാരണത്തിന് ഇറങ്ങിയിരുന്നു.
യുഡിഎഫ് സ്ഥാനാർഥിയായ ധര്മ്മജന് വോട്ട് ചോദിച്ച് രമേഷ് പിഷാരടിയും തെസ്നി ഖാനുമടക്കമുള്ളവര് രംഗത്ത് വന്നിരുന്നു. എൽഡിഎഫ് സ്ഥാനാർഥി ഗണേഷ് കുമാറിന് വോട്ട് ചോദിച്ച് മോഹന്ലാലും എത്തിയിരുന്നു. ഇതിനിടയിലാണ് കലാഭവന് ഷാജോണും കുടുംബവും കോണ്ഗ്രസില് ചേര്ന്നുവെന്ന വാര്ത്ത പ്രചരിച്ചത്.
Read also: ഖുര്ആന് പഠിപ്പിച്ചാൽ മാത്രം പെന്ഷന്; വർഗീയത പറഞ്ഞ് ബി ഗോപാലകൃഷ്ണൻ