കണ്ണൂർ: കോർപ്പറേഷന്റെ നേതൃത്വത്തിലുള്ള മഴക്കാലപൂർവ ശുചീകരണത്തിന്റെ രണ്ടാംഘട്ട പ്രവർത്തനങ്ങൾക്ക് 25 മുതൽ തുടക്കമാവും. കോർപ്പറേഷൻ പരിധിയിലെ പ്രധാനപ്പെട്ട അഞ്ചു കേന്ദ്രങ്ങളിൽ അന്നേദിവസം ശുചീകരണ പ്രവർത്തനങ്ങൾ നടത്തും. കൗൺസിലർമാരുടെയും ഉദ്യോഗസ്‌ഥരുടെയും ഓൺലൈൻ യോഗത്തിലാണ് തീരുമാനം.
26, 27 തീയതികളിലായി 55 ഡിവിഷനുകളിലും വാർഡുതല ശുചിത്വ കമ്മിറ്റി കൗൺസിലർമാരുടെ മേൽ‌നോട്ടത്തിൽ ശുചീകരണ പ്രവർത്തനങ്ങൾ നടത്തും. നേരത്തേ ഒന്നാംഘട്ട പ്രവർത്തനങ്ങളുടെ ഭാഗമായി കോർപ്പറേഷൻ പരിധിയിലെ ഓടകളും തോടുകളും ശുചീകരിച്ചിരുന്നു. അപകടകരമായ രീതിയിൽ നിൽക്കുന്ന മരച്ചില്ലകളും മറ്റും മുറിച്ചു മാറ്റിയിരുന്നു.
അതേസമയം ജനങ്ങൾ ഡെങ്കിപ്പനി പ്രതിരോധം ഏറ്റെടുക്കണമെന്ന് മേയർ അഡ്വ. ടിഒ മോഹനൻ അറിയിച്ചു. 29, 30 തീയതികളിൽ കോർപ്പറേഷൻ പരിധിയിലെ ആളുകൾ അവരവരുടെ വീടും പരിസരവും ശുചീകരിക്കാൻ തയ്യാറാവണമെന്നും ഡെങ്കിപ്പനി ഉൾപ്പടെയുള്ള പകർച്ചവ്യാധികൾ തടയുന്നതിനായി മുന്നിട്ടിറങ്ങണമെന്നും അദ്ദേഹം അഭ്യർഥിച്ചു.
മേയർ അധ്യക്ഷത വഹിച്ച യോഗത്തിൽ ഡെപ്യൂട്ടി മേയർ കെ ഷബീന, സ്‌ഥിരംസമിതി അധ്യക്ഷൻമാർ, കൗൺസിലർമാർ, സെക്രട്ടറി ഡി സാജു, ഹെൽത്ത് സൂപ്പർവൈസർ ദാമോദരൻ, ഹെൽത്ത് ഇൻസ്‌പെക്‌ടർമാർ തുടങ്ങിയവർ പങ്കെടുത്തു.
Malabar News: കുതിരയുമായി കറങ്ങാനിറങ്ങി; മാനസിക ഉല്ലാസത്തിനെന്ന് മറുപടി; പോലീസിനെ അമ്പരപ്പിച്ച് യുവാവ്
