കൊച്ചി: കന്യാസ്‍ത്രീകൾ ആക്രമിക്കപ്പെട്ട വിഷയത്തിൽ കേന്ദ്ര റെയിൽവേ മന്ത്രി പിയൂഷ് ഗോയലിന്റെ പ്രസ്‌താവന തള്ളി കെസിബിസി. ഉത്തരവാദിത്തപ്പെട്ട സ്‌ഥാനത്ത്‌ ഉള്ളവരിൽ നിന്ന് ഇത്തരം പ്രസ്‌താവനകൾ പാടില്ല. ഉത്തർപ്രദേശിൽ കന്യാസ്‍ത്രീകൾക്ക് എന്താണ് സംഭവിച്ചത് എന്ന് എല്ലാവരും അറിഞ്ഞതാണ്. കേന്ദ്രസർക്കാർ അടിയന്തരമായി പ്രശ്‌നത്തിൽ ഇടപെടണമെന്നും കെസിബിസി വക്‌താവ് പറഞ്ഞു.
കന്യാസ്‍ത്രീകളെ ട്രെയിനിൽ വെച്ച് എബിവിപി പ്രവർത്തകർ ആക്രമിച്ചു എന്നത് തെറ്റായ ആരോപണമാണെന്നും കേരളാ മുഖ്യമന്ത്രി ഇക്കാര്യത്തിൽ കള്ളം പ്രചരിപ്പിക്കുകയാണ് എന്നും പിയുഷ് ഗോയല്‍ പറഞ്ഞിരുന്നു. ബിജെപിയുടെ പ്രചാരണ പരിപാടിക്കിടെ ആയിരുന്നു കേന്ദ്ര റെയിൽവേ മന്ത്രിയുടെ പ്രതികരണം.
