വയനാട്: ജില്ലയിലെ മാനന്തവാടി കെഎസ്ആർടിസി ഡിപ്പോയിൽ കോവിഡ് വ്യാപന പ്രതിസന്ധി രൂക്ഷം. കഴിഞ്ഞ രണ്ടു ദിവസങ്ങളിലായി 40 പേർക്കാണ് ഇവിടെ രോഗം സ്ഥിരീകരിച്ചത്. കൂടുതൽ പേർ നിരീക്ഷണത്തിലും ആണ്. ഇതോടെ ജീവനക്കാരുടെ കുറവ് മൂലം ഡിപ്പോ അടച്ചിടേണ്ട സാഹചര്യമാണുള്ളത്.
ഒരു സ്റ്റേഷൻ മാസ്റ്റർ, 19 കണ്ടക്ടർമാർ, 20 ഡ്രൈവർമാർ എന്നിവർക്കാണ് രോഗം സ്ഥിരീകരിച്ചിരിക്കുന്നത്. ഇവരുമായി സമ്പർക്കത്തിൽ ഉള്ള കൂടുതൽ പേർക്ക് രോഗം വരാനുള്ള സാധ്യതയും ഉണ്ട്. എന്നാൽ, കൂടുതൽ പേർക്ക് രോഗം സ്ഥിരീകരിച്ചാൽ സർവീസുകൾ പൂർണമായി റദ്ദാക്കേണ്ടി വരുമെന്ന ആശങ്കയും ഉണ്ട്. മിക്ക റൂട്ടുകളും നിയന്ത്രിത മേഖലയായതിനാൽ ചുരുക്കം ചില ഭാഗങ്ങളിലേക്ക് മാത്രമാണ് നിലവിൽ സർവീസ് ഉള്ളത്.
അതേസമയം, കോവിഡ് പ്രതിരോധ നടപടികളിൽ അധികൃതർക്ക് വീഴ്ച സംഭവിച്ചിരുന്നതായി പരാതി ഉണ്ട്. ഡിപ്പോയിൽ പ്രതിരോധ സാമഗ്രികൾ നൽകുന്നതിൽ മാനേജ്മെന്റ് വീഴ്ച വരുത്തിയെന്നാണ് ആക്ഷേപം. കൂടാതെ, നിലവിൽ സാനിറ്റൈസർ പോലും വിതരണം ചെയ്യാത്ത സ്ഥിതിയാണെന്നും ജീവനക്കാർ ആരോപിച്ചു.
Read Also: ഇടുക്കി തോട്ടംമേഖലയിലെ ബാലവേല തടയാന് കർശന നടപടികളുമായി പോലീസ്