കോഴിക്കോട്: കോടഞ്ചേരി ടൗണിൽ വൈക്കോൽ കയറ്റിവന്ന ലോറിക്ക് തീ പിടിച്ചു. ഇന്ന് ഉച്ചക്ക് ഒരു മണിയോടെയാണ് സംഭവം. ഡ്രൈവറുടെ സംയോജിത ഇടപെടൽ കാരണം വൻ ദുരന്തം ഒഴിവായി. ലോറി റോഡരികിലെ ഗ്രൗണ്ടിലേക്ക് ഓടിച്ച് കയറ്റിയാണ് ഡ്രൈവർ അപകടം ഒഴിവാക്കിയത്.
കണ്ണോത്ത് ഭാഗത്തു നിന്ന് വൈക്കോൽ നിറച്ച ലോറിയിൽ നിന്ന് പുക ഉയരുന്നത് ഡ്രൈവറാണ് ആദ്യം കണ്ടത്. ഉടൻ കോടഞ്ചേരി ടൗണിലെ റോഡരികിലുള്ള ഗ്രൗണ്ടിലേക്ക് ലോറി ഓടിച്ചു കയറ്റി. ഈ സമയം വൈക്കോൽ കത്തി തുടങ്ങിയിരുന്നു. പാർക്ക് ചെയ്ത് ഡ്രൈവർ ഇറങ്ങിയ ശേഷം തീ ആളിപടരുകയായിരുന്നു.
തുടർന്ന് തൊട്ടടുത്ത ജോലി ചെയ്തിരുന്ന ജെസിബി ഉപയോഗിച്ച് വൈക്കോൽ കൂട്ടങ്ങൾ ലോറിയിൽ നിന്ന് പുറത്തേക്ക് വലിച്ചിട്ടു. വിവരം അറിയിച്ചതിനെ തുടർന്ന് മുക്കത്ത് നിന്ന് എത്തിയ ഫയർഫോഴ്സ് യൂണിറ്റും നാട്ടുകാരും ചേർന്നാണ് തീ അണച്ചത്. കോഴിക്കോട് കോടഞ്ചേരി അങ്ങാടിയിൽ സെന്റ് ജോസഫ് ഹയർ സെക്കണ്ടറി സ്കൂളിന് സമീപത്ത് വെച്ചാണ് വൈക്കോലിന് തീ പിടിച്ചത്.
Most Read: ബിജെപിയുമായി വീണ്ടും സഖ്യം; വാര്ത്ത തള്ളി ശിവസേന