തിരുവനന്തപുരം: കോവിഡ് മൂന്നാം തരംഗം മുന്നില് കണ്ട് കുട്ടികളുടേയും നവജാത ശിശുക്കളുടേയും തീവ്ര പരിചരണം ഉറപ്പാക്കുന്നതിന് വേണ്ടിയുള്ള ‘കുരുന്ന്-കരുതല്’ വിദഗ്ധ പരിശീലന പരിപാടിയുടെ സംസ്ഥാനതല ഉൽഘാടനം ആരോഗ്യ വകുപ്പ് മന്ത്രി വീണാ ജോര്ജ് നിര്വഹിച്ചു.
മെഡിക്കല് കോളേജുകള് കേന്ദ്രമാക്കി, അവിടത്തെ ശിശുരോഗ വിഭാഗത്തില് അതാത് ജില്ലകളിലും അനുബന്ധ ജില്ലകളിലുമുള്ള ശിശുരോഗ വിദഗ്ധര്ക്കും നഴ്സുമാര്ക്കുമുള്ള ഒരു ഓണ്സൈറ്റ് പരിശീലന പരിപാടിയാണ് ‘കുരുന്ന്-കരുതല്’.
കുട്ടികളിലെ കോവിഡ്, കോവിഡാനന്തര പ്രശ്നങ്ങൾ പരിഹരിക്കുന്നതിനായി സംസ്ഥാനത്തെ ആശുപത്രികള് സജ്ജമാക്കി വരുന്നതായി മന്ത്രി പറഞ്ഞു. ചികിൽസയ്ക്ക് ആവശ്യമായി വരാവുന്ന കുട്ടികളുടെ കിടക്കകള്, അത്യാവശ്യമായ ഓക്സിജന് സംവിധാനങ്ങള്, വെന്റിലേറ്ററുകള്, നിരീക്ഷണ ഉപകരണങ്ങള്, എന്നിവ ദ്രുതഗതിയില് ആശുപത്രികളില് എത്തിക്കാനുള്ള പ്രവര്ത്തനങ്ങള് നടന്നു വരികയാണ്. ഈ സാഹചര്യത്തില് കുട്ടികളുടെ അത്യാഹിത, തീവ്ര പരിചരണ വിഭാഗങ്ങളിലെ ചികിൽസയ്ക്കായി ആരോഗ്യ പ്രവര്ത്തകരെ സജ്ജരാക്കുന്നതിനാണ് ‘കുരുന്ന്-കരുതല്’ ആവിഷ്ക്കരിച്ചതെന്ന് മന്ത്രി പറഞ്ഞു.
കൂടാതെ തിരുവനന്തപുരം മെഡിക്കല് കോളേജ് എസ്എടി ആശുപത്രിയില് ഇതിന്റെ ആദ്യഘട്ട പരിശീലന പരിപാടി ആരംഭിച്ചുവെന്നും മൂന്നു ദിവസം നീളുന്ന ഈ പരിശീലന പരിപാടിയില് അത്യാഹിത വിഭാഗം, തീവ്രപരിചരണ വിഭാഗം, നവജാത ശിശു വിഭാഗം എന്നീ മേഖലകളില് അവശ്യമായ നൈപുണ്യം നേടിയെടുക്കാന് സാധിക്കുമെന്നും മന്ത്രി ചൂണ്ടിക്കാട്ടി.
തുടര്ന്ന് മറ്റ് ജില്ലകളിലെ മെഡിക്കല് കോളേജുകളിലെ ശിശുരോഗ വിദഗ്ധരുടെ നേതൃത്വത്തില് അതത് ജില്ലകളിലെ പരിശീലന പരിപാടി നടക്കുന്നതാണെന്നും മന്ത്രി കൂട്ടിച്ചേർത്തു.
ചടങ്ങിൽ ആരോഗ്യ വകുപ്പ് പ്രിന്സിപ്പല് സെക്രട്ടറി ഡോ. രാജന് എന് ഖോബ്രഗഡെ, എന്എച്ച്എം സ്റ്റേറ്റ് മിഷന് ഡയറക്ടർ ഡോ. രത്തന് ഖേല്ക്കര്, മെഡിക്കല് വിദ്യാഭ്യാസ വകുപ്പ് ഡയറക്ടര് ഡോ. എ റംലാ ബീവി, ആരോഗ്യ വകുപ്പ് ഡയറക്ടര് ഡോ. വിആര് രാജു, മെഡിക്കല് കോളേജ് പ്രിന്സിപ്പല് ഡോ. സാറ വര്ഗീസ് എന്നിവരും പങ്കെടുത്തു.
Most Read: വർക്കലയിൽ വിദേശ വനിതകൾക്ക് നേരെ ലൈംഗികാതിക്രമ ശ്രമം