പയ്യന്നൂർ: റോഡ് പണിക്ക് വേണ്ട ലോഡുമായി വരുന്ന വഴി പാർശ്വഭിത്തി ഇടിഞ്ഞ് ലോറി 15 അടി താഴ്‌ചയിലേക്ക് മറിഞ്ഞു. കണ്ണൂർ പരിയാരം ശ്രീസ്‌ഥ റോഡിൽ വ്യാഴാഴ്‌ച ഉച്ചയോടെയാണ് അപകടം. പരിയാരം-ശ്രീസ്‌ഥ-നെരുവമ്പ്രം റോഡ് പണിക്കായി വന്ന ലോറിയാണ് അപകടത്തിൽപ്പെട്ടത്. റോഡിന്റെ അരിക് തകർന്ന് ലോറി 15 അടി താഴ്‌ചയിലേക്ക് മറിയുകയായിരുന്നു. അപകടത്തിൽ ആർക്കും പരിക്കില്ല.
കണ്ണൂർ ചന്തപ്പുരയിൽ നിന്ന് പരിയാരം മെഡിക്കൽ കോളേജ് വഴി ശ്രീസ്‌ഥ-നെരുവമ്പ്രം ഭാഗത്തേക്ക് പോകുന്ന റോഡിന്റെ നവീകരണ പ്രവത്തനങ്ങളാണ് നടന്നുകൊണ്ടിരിക്കുന്നത്. എന്നാൽ റോഡിന്റെ പല പാർശ്വഭിത്തികൾക്കും പഴക്കമുള്ളതിനാൽ ഭാരമേറിയ വാഹനങ്ങൾ ഇതിലൂടെ കടന്നുപോകുമ്പോൾ അപകടഭീഷണി ഉയർത്തുന്നുണ്ട്. അതിനാൽ തന്നെ റോഡിന്റെ വീതികൂട്ടി നവീകരിക്കുമ്പോൾ ഇതിന്റെ പാർശ്വഭിത്തിയുടെ ഉറപ്പ് അധികൃതർ പരിശോധിക്കണമെന്ന ആവശ്യവും ഉയർന്നുവരുന്നുണ്ട്.
Read also: കേരളത്തിൽ 2 ദിവസം കൂടി മഴ തുടരാൻ സാധ്യത
