സിനിമാ കഫെ പ്രൊഡക്ഷന്സിന്റെ ബാനറില് മഞ്ജു ബാദുഷ നിർമിക്കുന്ന ‘മെയ്ഡ് ഇന് ക്യാരവാന്’ തിയേറ്ററിൽ തന്നെ റിലീസ് ചെയ്യാൻ കാത്തിരിക്കുമെന്ന് അണിയറ പ്രവർത്തകർ. കോവിഡ് പ്രതിസന്ധി ഉടൻ തീരുമെന്നും തിയേറ്ററുകൾ അടുത്തമാസത്തോടെ തുറക്കുമെന്നും ശേഷം റിലീസ് ചെയ്യാമെന്നുമുള്ള ശുഭ പ്രതീക്ഷയിലാണ് താനെന്നും ചിത്രത്തിന്റെ എക്സിക്യൂട്ടീവ് പ്രൊഡ്യൂസർ എൻഎം ബാദുഷ.
നവാഗതനായ ജോമി കുര്യാക്കോസ് സംവിധാനം ചെയ്യുന്ന ‘മെയ്ഡ് ഇന് ക്യാരവാന്’ കഥ, തിരക്കഥ തയാറാക്കിയത് സംവിധായകൻ തന്നെയാണ്. ദുബായിയിലെ പ്രവാസികളുടെ ജീവിതത്തിലെ വേറിട്ട കഥയുമായി എത്തുന്ന ചിത്രമാണ് ‘മെയ്ഡ് ഇന് ക്യാരവാന്’. കോവിഡ് കാലത്ത് അബുദാബിയിൽ തുടങ്ങി തൊടുപുഴയില് ചിത്രീകരണം പൂര്ത്തിയാക്കിയ സിനിമയിൽ പുതുമുഖം പ്രിജിൽ കേന്ദ്ര കഥാപാത്രത്തെ അവതരിപ്പിക്കുന്നു.
ചിത്രത്തിൽ ആനന്ദം ഫെയിം അന്നു ആന്റണിയാണ് നായിക. അന്നുവിനൊപ്പം ഇന്ദ്രൻസ്, ആൻസൺ പോൾ, മിഥുൻ രമേഷ് തുടങ്ങിയ മലയാളി താരങ്ങളെ കൂടാതെ അന്താരാഷ്ട്ര താരങ്ങളും മോഡലുകളുമായ ഹാഷെം കടൂറ, അനിക ബോയ്ലെ, ജെന്നിഫർ, നസ്സഹ എന്നിവരും ചിത്രത്തിൽ വേഷങ്ങൾ ചെയ്യുന്നുണ്ട്.
‘മെയ്ഡ് ഇന് ക്യാരവാന്’ ഫസ്റ്റ്ലുക്ക് പോസ്റ്റർ സിനിമാലോകത്തും ആസ്വാദകർക്കിടയിലും ഏറെ ശ്രദ്ധേയമായിരുന്നു. ദുബായ്, അബുദാബി, ഫുജൈറ, റാസ് അൽ ഖൈമ, തൊടുപുഴ എന്നിവിടങ്ങളായിരുന്നു പ്രധാന ലൊക്കേഷൻ. പ്രശസ്ത ഛായാഗ്രാഹകൻ ഷിജു എം ഭാസ്കറാണ് ചിത്രത്തിന്റെ ക്യാമറ കൈകാര്യം ചെയ്യുന്നത്.
Most Read: വ്യവസായ മേഖലയിൽ സമഗ്രമാറ്റം കൊണ്ടുവരും; മന്ത്രി പി രാജീവ്