മറയൂര്‍ : സഞ്ചാരികള്‍ക്ക് എന്നും പ്രിയപ്പെട്ട സ്ഥലങ്ങളാണ് ഇടുക്കിയിലെ മറയൂര്‍, കാന്തല്ലൂര്‍ ഉള്‍പ്പെടുന്ന മൂന്നാര്‍ പ്രദേശം. വന്യജീവി സങ്കേതങ്ങളും വെള്ളച്ചാട്ടങ്ങളും കാടും മലയും മഞ്ഞും എല്ലാം ഉള്‍പ്പെട്ട ഈ മനോഹരനാട് എന്നും യാത്രയെ പ്രണയിക്കുന്നവരുടെ പറുദീസ തന്നെയാണ്. കോവിഡ് പശ്ചാത്തലത്തില്‍ കഴിഞ്ഞ അഞ്ചു മാസങ്ങളായി സഞ്ചാരികളുടെ സ്പര്‍ശമേല്‍ക്കാതെ കിടന്നിരുന്ന ഇവിടം വീണ്ടും സന്ദര്‍ശകരെ കൊണ്ട് നിറയുകയാണ്.
മാസങ്ങളായി സഞ്ചാരികളെത്താതിരുന്ന മറയൂര്‍, കാന്തല്ലൂര്‍ പ്രദേശങ്ങളില്‍ കഴിഞ്ഞ ഒരാഴ്ചയായി ആളുകള്‍ എത്തിത്തുടങ്ങിയിട്ടുണ്ട്. ഇവിടങ്ങളിലെ ആനക്കോട്ടപ്പാറ പാര്‍ക്ക്, രാജീവ് ഗാന്ധി ചില്‍ഡ്രന്‍സ് പാര്‍ക്ക് എന്നിവ ഇപ്പോഴും തുറന്നിട്ടില്ല. പക്ഷേ കാന്തല്ലൂരിലും മറയൂരിലും എത്തുന്ന സന്ദര്‍ശകരെ ആകര്‍ഷിക്കാന്‍ മറ്റ് ചിലതൊക്കെ ഇപ്പോഴും അവിടെ കാത്തിരിക്കുന്നുണ്ട്. കാന്തല്ലൂരില്‍ വിളഞ്ഞു കിടക്കുന്ന ആപ്പിള്‍ തോട്ടങ്ങളും, ശര്‍ക്കര ഉത്പാദന കേന്ദ്രങ്ങളും, ഇരച്ചില്‍പ്പാറ വെള്ളച്ചാട്ടവും സന്ദര്‍ശകരെ വരവേല്‍ക്കാനായി ഒരുങ്ങി കഴിഞ്ഞു. ഇപ്പോള്‍ കാന്തല്ലൂരിലും മറയൂരിലും എത്തുന്ന സഞ്ചാരികള്‍ ഏറ്റവും കൂടുതല്‍ സന്ദര്‍ശിക്കുന്നതും ഇവയൊക്കെയാണ്.
കഴിഞ്ഞ ഓഗസ്റ്റ് 19 മുതല്‍ ചിന്നാര്‍ വന്യജീവി സങ്കേതത്തിലെ തൂവാനം വെള്ളച്ചാട്ടം, ആലാംപെട്ടി ട്രെക്കിങ്ങുകള്‍ എന്നിവ സഞ്ചാരികള്‍ക്കായി തുറന്നെങ്കിലും ഇതുവരെ സഞ്ചാരികള്‍ ഈ സ്ഥലങ്ങള്‍ ഒന്നും സന്ദര്‍ശിച്ചു തുടങ്ങിയിട്ടില്ല. റിസോര്‍ട്ടുകളും ലോഡ്ജുകളും അടഞ്ഞു തന്നെ കിടക്കുന്നതിനാല്‍ രാവിലെ മറയൂരിലെത്തി രാത്രിയോട് കൂടി സഞ്ചാരം മതിയാക്കി മടങ്ങുകയാണ് ഭൂരിഭാഗം സഞ്ചാരികളും. ചെറിയ തോതില്‍ സഞ്ചാരികള്‍ എത്തിത്തുടങ്ങിയതിനാല്‍ തന്നെ താമസിയാതെ മൂന്നാര്‍ മേഖലയിലെ ടൂറിസം വീണ്ടും പഴയ പ്രൗഢിയോടെ തിരികെയെത്തുമെന്നാണ് പ്രതീക്ഷ.
