നാഗ്പൂർ: ഇന്ത്യ ഹിന്ദു രാഷ്ട്രമാണ്, ഹിന്ദുത്വം രാജ്യത്തിന്റെ അന്തസത്തെയെന്ന് ആര്.എസ്.എസ്. അധ്യക്ഷന് മോഹന് ഭാഗവത്. സംഘം ഹിന്ദു രാഷ്ട്രം എന്ന് പറയുമ്പോള് അതിന് രാഷ്ട്രീയമോ അധികാര കേന്ദ്രീകൃതമോ ആയ അര്ഥമില്ലെന്നും മോഹന് ഭാഗവത് പറഞ്ഞു. ആര്.എസ്.എസ് ആസ്ഥാനത്ത് വിജയദശമി ദിന സന്ദേശത്തില് സംസാരിക്കുകയായിരുന്നു അദ്ദേഹം.
ഹിന്ദുത്വത്തെ ചിലര് വളച്ചൊടിച്ച് തെറ്റായ രീതിയില് പ്രചരിപ്പിക്കുകയാണ്. ഹിന്ദുത്വം രാജ്യത്തിന്റെ അസ്ഥിത്വമാണ്. രാജ്യത്തെ 1.3 ബില്യണ് ജനങ്ങള്ക്കും ഹിന്ദുത്വം എന്ന ആശയം ബാധകമാമെന്നും മോഹന് ഭാഗവത് പറഞ്ഞു. പൗരത്വ നിയമ ഭേദഗതിയും അതിനെതിരെ ഉയര്ന്നു വന്ന സമരങ്ങളെക്കുറിച്ചും മോഹന് ഭാഗവത് തന്റെ പ്രസംഗത്തില് പരാമര്ശിച്ചു.
പൗരത്വ നിയമ ഭേദഗതി ഒരു സമുദായത്തിനും എതിരല്ല. എന്നാല് ചിലര് മുസ്ലിങ്ങളെ തെറ്റിദ്ധരിപ്പിച്ച് സമര രംഗത്തിറക്കിയെന്നും മോഹന് ഭാഗവത് ആരോപിച്ചു. സി.എ.എയുടെ പേരില് അവസര വാദികള് സംഘടിത ആക്രമണം അഴിച്ചുവിടുക ആയിരുന്നുവെന്നും അദ്ദേഹം കുറ്റപ്പെടുത്തി. കോവിഡ് പശ്ചാത്തലത്തില് 50 സ്വയംസേവകര് മാത്രമാണ് വിജയദശമി ദിന ആഘോഷ ചടങ്ങില് അണിനിരന്നത്. മറ്റ് പ്രവര്ത്തകര്ക്കായി പ്രസംഗം ഓണ്ലൈന് സ്ട്രീമിങ് ചെയ്തു.