തിരുവനന്തപുരം: കോവിഡ് പശ്ചാത്തലത്തില് അധിക ജോലി ചെയ്യേണ്ടി വരുമ്പോഴും മാസങ്ങളായി ശമ്പളം ലഭിക്കാതെ ഒരു കൂട്ടം ജീവനക്കാര്. സംസ്ഥാന സാമൂഹിക നീതി വകുപ്പിന്റെ കീഴില് പ്രവര്ത്തിക്കുന്ന വൃദ്ധസദനങ്ങളിലെ ജീവനക്കാരാണ് ‘നീതിക്കായി’ നെട്ടോട്ടമോടുന്നത്. മാസങ്ങളായി ഇവര്ക്ക് ശമ്പളം ലഭിക്കുന്നില്ല. വേണ്ടത്ര പരിഗണന നല്കാതെ അനാസ്ഥ കാണിക്കുന്ന സാമൂഹിക നീതി വകുപ്പിനെ പറ്റി ജീവനക്കാര്ക്ക് പരാതികള് ഏറെയാണ്.
വൃദ്ധരെ പരിചരിക്കുന്ന സ്ഥാപനമായതിനാല് ഇവിടെ ജോലി ചെയ്യുന്നവര്ക്ക് പുറത്ത് പോകാന് അനുവാദമില്ല. കോവിഡ് സാഹചര്യത്തില് പകല് 9 മണിക്കൂറും രാത്രി 12 മണിക്കൂറുമാണ് ഇവര്ക്ക് തുടര്ച്ചയായി ജോലി ചെയ്യേണ്ടി വരുന്നത്.
സംസ്ഥാനത്ത് സാമൂഹിക നീതി വകുപ്പിന്റെ കീഴിലുള്ള 16 വൃദ്ധസദനങ്ങളിലായി 800 ഓളം അന്തേവാസികളാണുള്ളത്. ഇവിടെ നഴ്സുമാര്, കെയര് പ്രൊവൈഡര്മാര് തുടങ്ങി നിരവധി പേര് സേവനം അനുഷ്ഠിക്കുന്നുണ്ട്. ഇവര്ക്ക് ശമ്പളം ലഭിച്ചിട്ട് 6 മാസത്തിലേറെയായി എന്നാണ് പരാതി. കൂടാതെ നിലവിലെ സര്ക്കാര് അധികാരമേറ്റതിന് ശേഷം പല തവണയായി ഉത്സവ സീസണുകളില് ലഭിച്ചു കൊണ്ടിരുന്ന ബോണസ് തുക മുടങ്ങിയതായും ജീവനക്കാര് ആരോപിക്കുന്നു. ആതുര സേവനത്തില് ഏര്പ്പെടുമ്പോഴും അവരുടെ ജീവിതം മുന്നോട്ട് കൊണ്ട് പോകാനുള്ള വഴി തുറക്കേണ്ടത് അധികൃതരുടെ ഉത്തരവാദിത്തമാണ്.