പാരിസ്: മാഞ്ചസ്റ്റര്‍ യുണൈറ്റഡിന്റെ സൂപ്പര്‍ താരം പോള്‍ പോഗ്ബക്ക് കോവിഡ്-19 സ്ഥിരീകരിച്ചു. പ്രീമിയര്‍ ലീഗ് പൂര്‍ത്തിയാക്കിയ ശേഷം യുവേഫ നേഷന്‍സ് ലീഗില്‍ പങ്കെടുക്കാനായി ഫ്രാന്‍സിലേക്ക് പോയ പോഗ്ബക്ക് ദേശീയ ക്യാംപിനിടെ നടത്തിയ പരിശോധനയിലാണ് കോവിഡ് സ്ഥിരീകരിക്കുന്നത്. ക്രോയേഷ്യക്കും സ്വീഡനും എതിരെയുള്ള നേഷന്‍സ് ലീഗിന്റെ ടീമിനെ പ്രഖ്യാപിച്ചതിനോടൊപ്പം ഫ്രാന്‍സിന്റെ പരിശീലകന്‍ ദിദിയര്‍ ദെഷാംപ്സ് ആണ് പോഗ്ബയുടെ രോഗവിവരം പുറത്തുവിടുന്നത്. തുടര്‍ന്ന് പോഗ്ബയെ ടീമില്‍ നിന്ന് ഒഴിവാക്കി പകരം 17 കാരനായ എഡ്വേര്‍ഡോ കാംവിംഗയെ കളത്തിലിറക്കുമെന്നും ദെഷാംപ്സ് വ്യക്തമാക്കി. സ്വീഡനെതിരെയുള്ള മത്സരത്തിന്റെ ടീമില്‍ പോഗ്ബ ഉണ്ടായിരുന്നെങ്കിലും രോഗം സ്ഥിരീകരിച്ചതിനെ തുടര്‍ന്ന് ടീമില്‍ മാറ്റം വരുത്താന്‍ നിര്‍ബന്ധിതനായെന്ന് ദിദിയര്‍ ദെഷാംപ്സ് പറഞ്ഞു.
പോഗ്ബ 14 ദിവസം ഐസൊലേഷനില്‍ കഴിയണം. അതിനാല്‍, നേഷന്‍സ് ലീഗിന് പുറമേ അടുത്ത ആഴ്‌ച തുടങ്ങുന്ന മാഞ്ചസ്റ്റര്‍ യുണൈറ്റഡിന്റെ പ്രീ സീസണ്‍ മത്സരങ്ങളും പോഗ്ബക്ക് നഷ്ടമാകും. എന്നാല്‍, ക്രിസ്റ്റല്‍ പാലസിനെതിരെ സെപ്തംബര്‍ 19 ന് നടക്കുന്ന യുണൈറ്റഡിന്റെ ആദ്യ മത്സരത്തിന് പോഗ്ബ പങ്കെടുക്കുമെന്നാണ് സൂചന.
