കൊച്ചി: സ്വര്ണക്കടത്ത് കേസില് മുഖ്യപ്രതി സ്വപ്നാ സുരേഷിന്റെ രഹസ്യ മൊഴി കസ്റ്റംസിന് കൈമാറാന് എറണാകുളം സിജെഎം കോടതി അനുമതി നല്കി. അന്വേഷണ ഉദ്യോഗസ്ഥനായ കസ്റ്റംസ് സൂപ്രണ്ട് വിവേകിന്റെ അപേക്ഷയിലാണ് തീരുമാനം. നേരത്തെ കസ്റ്റംസ് പ്രോസിക്യൂട്ടര് സമാന ആവശ്യമുന്നയിച്ച് നല്കിയ അപേക്ഷ കോടതി മടക്കിയിരുന്നു.
അന്വേഷണ ഉദ്യോഗസ്ഥന് വഴി കോടതിയെ സമീപിക്കാന് നിര്ദേശിച്ചാണ് അപേക്ഷ മടക്കിയത്. കേസില് വലിയ വെളിപ്പെടുത്തലുകള് ഉണ്ടെന്ന് കരുതുന്ന സ്വപ്നാ സുരേഷിന്റെ രഹസ്യ മൊഴിയുടെ പകര്പ്പാണ് കസ്റ്റംസിന് ലഭിക്കുക. താനുമായി ബന്ധമുള്ള ഉന്നത ഉദ്യോഗസ്ഥരുടെയും രാഷ്ട്രീയ നേതാക്കളുടെയും വിശദ വിവരങ്ങള് സ്വപ്ന രഹസ്യ മൊഴിയില് ഉള്പ്പെടുത്തിയിട്ടുണ്ടെന്നാണ് വിവരം.
കസ്റ്റംസ് കസ്റ്റഡിയിലിരിക്കെ സ്വര്ണക്കടത്ത് കേസില് ഉള്പ്പെട്ട ഉന്നതരെ കുറിച്ച് സ്വപ്നയും സരിത്തും മൊഴി നല്കിയിരുന്നു. ഇതിനു പിന്നാലെയാണ് രഹസ്യ മൊഴി രേഖപ്പെടുത്തണമെന്ന് ആവശ്യപ്പെട്ട് ഇരുവരും കോടതിയെ സമീപിച്ചത്.
Read also: ‘നീതി കിട്ടിയില്ലേ എനിക്ക് അതുമതി’; സിസ്റ്റര് അഭയ കേസ് വിധിയില് അടയ്ക്കാ രാജു
