തിരുവനന്തപുരം: കോവിഡ് പ്രതിരോധത്തില്‍ കേരളത്തെ അഭിനന്ദിച്ച രാഹുല്‍ ഗാന്ധിക്ക് എതിരെ പ്രതിപക്ഷ നേതാവ് രമേശ് ചെന്നിത്തല. പ്രാദേശിക വിഷയങ്ങളില്‍ രാഹുല്‍ അഭിപ്രായം പറയേണ്ടതില്ല. അത്തരം കാര്യങ്ങളില്‍ അഭിപ്രായം പറയാന്‍ ഇവിടെ നേതാക്കളുണ്ട്, വാര്‍ത്താ സമ്മേളനത്തില്‍ ചെന്നിത്തല പറഞ്ഞു.
‘രാഹുല്‍ ഗാന്ധിയെ പോലുള്ള നേതാവ് ഇവിടെ വന്ന് പ്രാദേശിക വിഷയങ്ങളില്‍ ഇടപെട്ട് സംസാരിക്കുന്നത് ശരിയല്ല എന്ന അഭിപ്രായമാണ് എനിക്കുള്ളത്. ഞങ്ങളൊക്കെ ഇവിടെയുണ്ടല്ലോ കാര്യങ്ങള്‍ പറയാന്‍. അദ്ദേഹം ആ നിലയില്‍ നിന്നുകൊണ്ട് പറഞ്ഞാല്‍ മതി. അതാണ് ഞങ്ങളുടെ അഭിപ്രായം. ഈ ബ്ലെയിം ഗെയിം നടത്തരുതെന്ന് രാഹുല്‍ ഗാന്ധി പറഞ്ഞതില്‍ എല്ലാമുണ്ട്’- ചെന്നിത്തല പറഞ്ഞു. കേന്ദ്ര- സംസ്‌ഥാന സര്‍ക്കാരുകള്‍ പരസ്‌പരം പഴിചാരുകയാണെന്നാണ് രാഹുല്‍ പറഞ്ഞതെന്നും ചെന്നിത്തല വിശദീകരിച്ചു.
കോവിഡ് പ്രതിരോധ പ്രവര്‍ത്തനത്തില്‍ കേരളം മികച്ച മാതൃകയാണെന്ന് വയനാട് സന്ദര്‍ശന വേളയില്‍ രാഹുല്‍ ഗാന്ധി പറഞ്ഞിരുന്നു. കോവിഡ് പ്രതിരോധത്തില്‍ കേരളം പരാജയപ്പെട്ടതായി കേന്ദ്ര ആരോഗ്യമന്ത്രി ഹര്‍ഷവര്‍ധന്റെ പ്രതികരണം ദൗര്‍ഭാഗ്യകരമാണെന്നും രാഹുല്‍ പറഞ്ഞിരുന്നു.
