തിരുവനന്തപുരം: രാഹുല് ഗാന്ധി വിഭാവനം ചെയ്ത, മിനിമം വരുമാനം ഉറപ്പാക്കുന്ന ‘ന്യായ്’ പദ്ധതി കേരളത്തിലെ നിയമസഭാ പ്രകടന പത്രികയില് ഉള്പ്പെടുത്തി യുഡിഎഫ്. 2019ലെ ലോകസഭാ തിരഞ്ഞെടുപ്പിന് മുന്നോടിയായി കോണ്ഗ്രസ് അധ്യക്ഷനായിരുന്ന രാഹുല് ഗാന്ധി മുന്നോട്ടുവെച്ച പദ്ധതി പാവപ്പെട്ട കുടുംബങ്ങളുടെ അക്കൗണ്ടില് മാസം 6000 രൂപ ലഭ്യമാക്കുന്നതാണ്.
ഒരു കുടുംബത്തിന് പ്രതിവര്ഷം 72,000 രൂപ ലഭ്യമാക്കുന്ന ഈ പദ്ധതിക്ക് കേരളത്തില് നിന്നും ദാരിദ്ര്യം തുടച്ചുനീക്കാന് കഴിയുമെന്ന് പ്രതിപക്ഷ നേതാവ് രമേശ് ചെന്നിത്തല പറഞ്ഞു. ഫേസ്ബുക്കിലൂടെ ആയിരുന്നു ചെന്നിത്തലയുടെ പ്രതികരണം. ന്യായ് പദ്ധതി പൂര്ണതോതില് നടപ്പിലാക്കുന്ന ആദ്യ സംസ്ഥാനമായി കേരളം മാറുമെന്നും പ്രതിപക്ഷ നേതാവ് അറിയിച്ചു.
അതേസമയം പ്രകടനപത്രികയില് പൊതുജനങ്ങളില് നിന്ന് അഭിപ്രായങ്ങളും നിര്ദേശങ്ങളും മെയില് വഴി സ്വീകരിക്കാനും യുഡിഎഫ് തീരുമാനിച്ചിട്ടുണ്ട്. ഇത്തണ നിയമസഭാ തിരഞ്ഞെടുപ്പിനെ യുഡിഎഫ് സമീപിക്കുക ജനകീയ മാനിഫെസ്റ്റോയും ആയിട്ടാണ് എന്നും ചെന്നിത്തല വ്യക്തമാക്കി.
Read Also: ബിഹാറില് ക്രമസമാധാനം നിലനിര്ത്താന് സര്ക്കാരിന് കഴിയുന്നില്ലെന്ന് ബിജെപി എംപി