കോഴിക്കോട്: പാവമണി റോഡിൽ കവർച്ച നടത്തിയ നാലംഗ സംഘത്തിലെ മൂന്നുപേർ അറസ്റ്റിൽ. ബിവറേജ് ഷോപ്പിന് സമീപം നിന്ന സുഹൃത്തുക്കളായ രണ്ടുപേരിൽ നിന്നും പണവും മൊബൈലും കവർന്ന കേസിലെ പ്രതികളായ വയനാട് പുൽപ്പള്ളി മണൽവയൽ കാളിപറമ്പിൽ വിശ്വരാജ് (40), കൽപറ്റ ഗ്രീൻ വർഗീസ് കോളനിയിൽ ബാബു (33), കോഴിക്കോട് കുരുവട്ടൂർ ഉണിപറമ്പത്ത് താഴം ചൈത്രം വീട്ടിൽ ലജ്പത് (48) എന്നിവരാണ് പിടിയിലായത്.
പൈലിങ് ജോലിക്കെത്തിയ തമിഴ്നാട് സ്വദേശികളായ സുഹൃത്തുക്കൾ തിങ്കളാഴ്ച ഉച്ചയ്ക്ക് പാവമണി റോഡിലുള്ള ബിവറേജ് ഷോപ്പിനുസമീപം നിൽക്കുമ്പോൾ നാലുപേർ വന്ന് വളയുകയും മർദിച്ച് ആയുധംകാട്ടി ഭീഷണിപ്പെടുത്തി 4000 രൂപയും മൊബൈൽ ഫോണും കവരുകയുമായിരുന്നു.
കസബ പോലീസ് എസ്ഐ എസ് അഭിഷേകിന്റെ നേതൃത്വത്തിലുള്ള സംഘമാണ് പ്രതികളെ അറസ്റ്റ് ചെയ്തത്. ഇവർക്കെതിരെ നിരവധി കവർച്ചാ കേസുകൾ നിലവിലുണ്ട്. ഇവരുടെ സംഘത്തിലെ നാലാമനെക്കുറിച്ച് സൂചന ലഭിച്ചതായും ഉടൻ തന്നെ പിടിയിലാകുമെന്നും പോലീസ് പറഞ്ഞു.
കസബ പോലീസ് സ്റ്റേഷനിലെ സബ് ഇൻസ്പെക്ടർ ടിഎസ് ശ്രീജിത്ത്, സിപിഒമാരായ വികെ പ്രണീഷ്, ഇ ശ്രീജേഷ്, പി മനോജ്, പി പവിത്രൻ, ഡ്രൈവർ സിപിഒ എം സക്കറിയ എന്നിവരും അന്വേഷണ സംഘത്തിൽ ഉണ്ടായിരുന്നു.
Malabar News: പോലീസിന് മേൽ സർക്കാരിന് നിയന്ത്രണം നഷ്ടമായി; വിമർശനം