സംസ്ഥാനത്തെ സ്വകാര്യ ബസുകള്ക്ക് 3 മാസത്തേക്കു നികുതി ഇളവ് ലഭിച്ചു. സ്വകാര്യ, ടൂറിസ്റ്റ് ബസുകള്, സ്കൂള് ബസുകള് എന്നിവയെ പൂര്ണമായി വാഹന നികുതിയില്നിന്ന് ഒഴിവാക്കിയതായി മന്ത്രി എ.കെ. ശശീന്ദ്രന് പറഞ്ഞു. സ്കൂള് ബസുകള്ക്ക് 6 മാസത്തേക്കാണ് നികുതി ഒഴിവാക്കിയിരിക്കുന്നത്.
ഇന്നലെ ചേര്ന്ന മന്ത്രിസഭാ യോഗത്തിലാണ് ഇക്കാര്യത്തില് തീരുമാനമെടുത്തത്. സ്വകാര്യ ബസുകള്, കോണ്ട്രാക്റ്റ് ഗാരേജ്, സ്കൂള് ബസുകള് എന്നിവക്കാണ് നികുതി ഇളവ് നല്കുക. ഇതുവഴി സര്ക്കാരിന് 90 കോടിയോളം രൂപയുടെ നികുതി നഷ്ടമുണ്ടാകും. ബസ് ഉടമകള് എല്ലാ റൂട്ടിലും സര്വീസ് നടത്തുമെന്ന് അറിയിച്ചതായാണ് ഗതാഗത വകുപ്പ് മന്ത്രി എ.കെ. ശശീന്ദ്രന് വ്യക്തമാക്കിയത്.
നികുതി ഇളവ് വരുത്തിയ സാഹചര്യത്തിലും സ്വകാര്യ ബസ് ഉടമകള് സര്വീസ് നടത്താതിരുന്നാല് പെര്മിറ്റ് റദ്ദാക്കുമെന്നും മന്ത്രി അറിയിച്ചു. 2 ജില്ലകളിലൂടെ കടന്നുപോകാവുന്ന ദീര്ഘദൂര സര്വീസ് എന്ന സ്വകാര്യ ബസുടമകളുടെ ആവശ്യവും മുഖ്യമന്ത്രി അധ്യക്ഷനായ അവലോകന സമിതി പരിശോധിക്കും.