ഹൈദരാബാദ്: തെലങ്കാനയിൽ ലൈംഗികാതിക്രമത്തെ എതിർത്ത 13കാരിയെ തീ കൊളുത്തി കൊല്ലാൻ ശ്രമം. 26കാരനാണ് പെൺകുട്ടിയെ തീ കൊളുത്തി കൊല്ലാൻ ശ്രമിച്ചത്. 70 ശതമാനം പൊള്ളലേറ്റ പെൺകുട്ടി ആശുപത്രിയിൽ ചികിൽസയിലാണ്.
സെപ്റ്റംബർ 18ന് ഹൈദരാബാദിൽ നിന്ന് 195 കിലോമീറ്റർ അകലെയുള്ള ഖമ്മം ജില്ലയിലാണ് സംഭവം നടന്നത്. എന്നാൽ ഇപ്പോൾ പോലീസ് അന്വേഷണം ആരംഭിച്ചതിന് ശേഷമാണ് സംഭവം പുറംലോകം അറിയുന്നത്. പ്രതിയെ പോലീസ് അറസ്റ്റ് ചെയ്തു. കൊലപാതക ശ്രമം, കുട്ടികൾക്കെതിരായ ലൈംഗികാതിക്രമം തടയൽ നിയമം എന്നീ വകുപ്പുകൾ പ്രകാരമാണ് പോലീസ് കേസെടുത്തത്. ഒപ്പം തെളിവ് നശിപ്പിച്ചതിനും പ്രതിക്കെതിരെ കുറ്റം ചുമത്തിയിട്ടുണ്ട്.
Also Read: കുല്ഭൂഷണ് ജാദവിന് വേണ്ടി ഹാജരാവാന് പാക് അഭിഭാഷകര് എതിര്പ്പറിയിച്ചു
ആശുപത്രി അധികൃതരോ പെൺകുട്ടിയുടെ ബന്ധുക്കളോ വിവരം പുറത്തുപറയാതിരുന്നത് എന്തുകൊണ്ടാണെന്ന് അന്വേഷിക്കാൻ ജില്ലാ ആരോഗ്യ വിഭാഗത്തോട് നിർദ്ദേശിച്ചതായി ഖമ്മം ജില്ലാ പോലീസ് കമ്മീഷണർ തഫ്സീർ ഇഖ്ബാൽ പറഞ്ഞു.
കിടപ്പിലായ രോഗിയെ പരിചരിക്കുന്നതിനായി പെൺകുട്ടി പ്രതിയുടെ വീട്ടിൽ പോകാറുണ്ടായിരുന്നു. പീഡന ശ്രമം എതിർത്തപ്പോൾ പ്രതി പെട്രോൾ ഒഴിച്ച് തീ കൊളുത്തുകയായിരുന്നു എന്ന് പെൺകുട്ടി പോലീസിന് മൊഴി നൽകി.