മുംബൈ: അടുത്ത വര്ഷത്തേക്കുള്ള ഐപിഎല് താരലേലത്തിന് മുന്നോടിയായി ആഭ്യന്തര ടി-20 ടൂര്ണമെന്റായ സയ്യിദ് മുഷ്താഖ് അലി ട്രോഫി നടത്താന് ബിസിസിഐ തീരുമാനിച്ചേക്കും. സാധാരണഗതിയില് രഞ്ജി ട്രോഫി മത്സരങ്ങള്ക്ക് ശേഷമാണ് മുഷ്താഖ് അലി ട്രോഫി നടക്കാറുള്ളത്. എന്നാല് വരുന്ന ഐപിഎല് സീസണില് കൂടുതല് ആഭ്യന്തര താരങ്ങള്ക്ക് അവസരം ലഭിക്കാന് വേണ്ടിയാണ് ജനുവരിയില് ടൂര്ണമെന്റ് നടത്താന് ബിസിസിഐ ആലോചിക്കുന്നത്.
നിലവില് എട്ട് ടീമുകള് മാത്രമുള്ള ഐപിഎല്ലിലേക്ക് വരുന്ന സീസണില് രണ്ട് ടീമിനെക്കൂടി ഉള്പ്പെടുത്താനാണ് ബിസിസിഐയുടെ ആലോചന. ഇതോടെ മെഗാ താരലേലം നടത്തേണ്ടത് ആവശ്യമായി വരുമെന്നാണ് ബിസിസിഐ കണക്കുകൂട്ടുന്നത്. ഏപ്രില്-മെയ് മാസങ്ങളില് ഐപിഎല് നടക്കേണ്ടതിനാല് താരലേലം ഇതിന് മുന്പ് നടത്തണം. അതുകൊണ്ട് ജനുവരിയില് തന്നെ മുഷ്താഖ് അലി ട്രോഫി നടത്തേണ്ടി വരും.
ഒന്നിലേറെ മല്സര വേദികളും സ്റ്റാർ ഹോട്ടല് സൗകര്യവുമുള്ള നഗരങ്ങളെക്കുറിച്ച് റിപ്പോര്ട്ട് നല്കാന് ബിസിസിഐ സംസ്ഥാന ക്രിക്കറ്റ് അസോസിയേഷനുകളോട് ആവശ്യപ്പെട്ടിട്ടുണ്ട്.
ഹോട്ടലുകളില് ബയോ ബബിള് സാഹചര്യത്തില് മൂന്ന് ടീമിനെങ്കിലും കഴിയാനുള്ള സൗകര്യമാണ് പരിഗണിക്കുന്നത്. ഒപ്പം പരിശീലന സൗകര്യവും കണക്കിലെടുക്കും. നിലവില് കൊല്ക്കത്തയാണ് മുഖ്യ പരിഗണനയില്. സാള്ട്ട് ലേക്ക്, ഈഡന് ഗാര്ഡന്സ്, കല്യാണി എന്നീ വേദികളാണ് കൊല്ക്കത്തയില് ഉള്ളത്.
Read Also: ‘നവരസ’; ഗൗതം മേനോന്-സൂര്യ ചിത്രം ആരംഭിച്ചു