കണ്ണൂർ: ജില്ലയിലെ പാലുകാച്ചിപ്പാറയിലും, പുരളി മലയിലും സഞ്ചാരികളുടെ തിരക്ക് വർധിക്കുന്നു. കോവിഡ് നിയന്ത്രണങ്ങൾ നിലനിൽക്കുമ്പോഴും പ്രകൃതി സൗന്ദര്യം ആസ്വദിക്കാനായി ഇവിടേക്ക് ആളുകൾ വലിയ രീതിയിൽ എത്തുന്നുണ്ട്. ജില്ലയിലെ മാലൂർ പഞ്ചായത്തിലാണ് പാലുകാച്ചിപ്പാറയും, പുരളി മലയും സ്‌ഥിതി ചെയ്യുന്നത്.
സമുദ്രനിരപ്പിൽ നിന്നു മൂവായിരത്തോളം അടി ഉയരത്തിലാണ് പാലുകാച്ചിപ്പാറ നിൽക്കുന്നത്. ഇതിന്റെ സൗന്ദര്യം ആസ്വദിക്കുന്നതിനായി ജില്ലയുടെ വിവിധ ഭാഗങ്ങളിൽ നിന്നും ആളുകൾ എത്തുന്നുണ്ട്. ടെലിഫോൺ സംവിധാനം വ്യാപകമാകുന്നതിനു മുൻപ് തന്നെ ഇവിടെ മൈക്രോ വേവ് ടവർ സ്‌ഥാപിച്ചിരുന്നു. കോഴിക്കോട്- മംഗളുരു എസ്ടിഡി സംവിധാനത്തിനും ദുർദർശന്റെ ഭൂതല സംപ്രേഷണത്തിനുമുള്ള ടവറും വർഷങ്ങൾക്ക് മുൻപ് തന്നെ ഇവിടെ സ്‌ഥാപിച്ചിട്ടുണ്ട്.
അതേസമയം പുരളി മല ആരെയും ആകർഷിക്കാൻ തക്കവണ്ണം പ്രകൃതി സൗന്ദര്യം നിറഞ്ഞ സ്‌ഥലമാണ്‌. ഇതിന്റെ നാല് വശത്തും മലയും, താഴ്‌വരയും, കടലും ഉൾപ്പെടുന്ന മനോഹര കാഴ്‌ചകളാണ് സഞ്ചാരികളെ കാത്തിരിക്കുന്നത്. കൂടാതെ പുരളി മലയിൽ ഇക്കോ ടൂറിസം പദ്ധതിക്കായി 3.33 കോടി രൂപയുടെ എസ്‌റ്റിമേറ്റ് തയ്യാറാക്കി സർക്കാർ തലത്തിൽ സമർപ്പിച്ചെങ്കിലും, ഇതുവരെ പ്രാരംഭ പ്രവർത്തനങ്ങൾ പോലും തുടങ്ങിയിട്ടില്ല.
Read also: ട്രെയിനിലെ പോലീസ് മർദ്ദനം; മനുഷ്യാവകാശ കമ്മീഷൻ സ്വമേധയാ കേസെടുത്തു
