തിരുവനന്തപുരം: പലയിടത്തും വോട്ടിങ് മെഷീൻ തകരാറിലായി. ഇതിനെത്തുടർന്ന് പല ബൂത്തുകളിലും വോട്ടിങ് തടസപ്പെട്ടു. പെരുമ്പാവൂർ പോഞ്ഞാശ്ശേരി യുപി സ്കൂളിലെ 116ആം നമ്പർ ബൂത്തിൽ മെഷീൻ തകരാർ മൂലം വോട്ടിങ് നിർത്തി വച്ചിരിക്കുകയാണ്. ക്യൂ നിന്നവർക്ക് ടോക്കൺ കൊടുത്തയച്ചു. മെഷീന് തകരാര് മൂലം കോഴിക്കോട് സൗത്ത് ബൂത്ത് 127 കണ്ണഞ്ചേരി സ്കൂളിൽ വോട്ടിങ് തുടങ്ങിയിട്ടില്ല.
പേരാവൂർ മണ്ഡലത്തിലെ 117 എ വെള്ളറവള്ളി ബൂത്തിൽ വോട്ടിങ് മെഷീൻ തകരാറിൽ ആയതിനാൽ വോട്ടിങ് ആരംഭിച്ചില്ല. കൂടാതെ ചങ്ങനാശേരി 117ആം നമ്പർ ബൂത്തിലും ആർപ്പൂക്കര മണിയാപറമ്പ് എസ്എൻഡിപി സ്കൂളിലും വോട്ടിങ് മെഷീൻ തകരാറിൽ ആയതുമൂലം ഇത് വരെ പോളിങ് തുടങ്ങാനായില്ല.
ചിറക്കടവ് പഞ്ചായത്തിലെ ചെറുവള്ളി ഗവ. എൽപി സ്കൂളിലെ 76ആം നമ്പർ ബൂത്തിൽ വോട്ടിങ് മെഷീൻ തകരാറിലായതിനെ തുടർന്ന് മുക്കാൽ മണിക്കൂറോളം വോട്ടിങ് തടസപ്പെട്ടു. മോക്ക് പോളിലാണ് തകരാർ കണ്ടെത്തിയത്. വോട്ടിങ് താമസിച്ചതോടെ 40ഓളം പേർ വോട്ട് ചെയ്യാതെ മടങ്ങി.
വെച്ചൂർ ഇടയാഴം സെന്റ് മേരീസ് എല്പി സ്കൂളിൽ രണ്ട് വോട്ട് കഴിഞ്ഞപ്പോൾ വോട്ടിങ് മെഷീൻ തകരാറിലായി. തലയാഴം പുത്തൻപാലം 123 ബൂത്തിൽ മെഷീൻ തകരാറിനെ തുടർന്ന് വോട്ടിങ് നിർത്തിവെച്ചു. തിരുവല്ലയിൽ കുന്നന്താനം, മുണ്ടിയപ്പള്ളി, പുറമറ്റം എന്നീ 3 ബൂത്തുകളിൽ മെഷീൻ തകരാറിലായി.
മലപ്പുറം പാണക്കാട് എഎംഎല്പി സ്കൂളിൽ 95ആം ബൂത്തിൽ മോക്ക് പോളിങ്ങിനിടെ വിവിപാറ്റ് മെഷീൻ തകരാറിലായി. 38 വോട്ടുകൾ പോൾ ചെയ്ത ശേഷമാണ് തകരാറിലായത്.
Also Read: വികസന തുടർച്ചക്ക് ജനങ്ങൾ പിന്തുണ നൽകും; കെകെ ശൈലജ